Еврокомиссия Мета компаниясининг Facebook ва Instagram’да дезинформациялар тарқалишига қарши курашдаги самарадорлигини Рақамли хизматлар тўғрисидаги қонунга мувофиқ текширмоқда.

Европа комиссияси (ЕК) 30 апрел, сешанба куни Американинг Meta корпорациясига тегишли бўлган Facebook ва Instagram ижтимоий тармоқларида Рақамли хизматлар тўғрисидаги қонун (DSA)нинг эҳтимолий бузилишлари юзасидан текширув бошлади. Компания, хусусан, июн ойида бўлиб ўтадиган Европарламентга сайловлар олдидан фойдаланувчиларни хориждан келаётган дезинформациядан ҳимоя қилиш учун етарлича ҳаракат қилмаётганликда гумонланмоқда. 

Текширув «самарали чора-тадбирлар кўрилишини таъминлаш, хусусан, Facebook ва Instagram’нинг заифликларидан чет эл аралашуви натижасида фойдаланишнинг олдини олишга қаратилган», деди ички бозор бўйича Европа комиссари Терри Бретон. Еврокомиссия раиси ўринбосари Маргрете Вестагернинг сўзларига кўра, ЕИ регуляторлари Meta ижтимоий тармоқларида модерация «етарлича самарали эмас» ва унда «реклама ва контентни модерация қилиш тартиб-таомилларида шаффофлик йўқ» деб гумон қилмоқда. 

Брюссел, айниқса, Meta’нинг «самарали» мониторинг воситаси йўқлигидан хавотирда, чунки корпорация ижтимоий тармоқлар учун контентни кузатувчи ва оптималлаштирадиган CrowdTangle хизматидан фойдаланмаслигини эълон қилди. ЕК компанияга CrowdTangle’ни фойдаланишдан чиқариш билан боғлиқ хавфларни юмшатиш учун қандай ҳаракатлар қилгани ҳақида ҳисобот тақдим этиши учун беш иш куни берди. 

DSA’ни бузганлар жаримага тортилади ёки ҳатто ЕИда ишлаши тақиқланади 

Facebook ва Instagram Европанинг 2023 йилда кучга кирадиган DSA’га бўйсунадиган «жуда йирик онлайн платформалар» рўйхатига киради. Қонунга кўра, ойига 45 миллиондан ортиқ фойдаланувчи аудиториясига эга йирик платформалар ва қидирув тизимлари ўзи жойлаштирган контентни қаттиқроқ назорат қилиши ва назорат органларига тўловлар тўлаши керак. Қоидаларни бузган тақдирда, агар улар уни яна бир марта бузса, Европа Иттифоқида фаолият юритиши тақиқланиши мумкин.

Meta текширувнинг моҳиятига изоҳ бермади, фақат унинг платформаларида «хавфларни аниқлаш ва камайтириш бўйича яхши йўлга қўйилган жараён» борлигини билдирди. «Биз Еврокомиссия билан ҳамкорликни давом эттиришни ва уларга бу иш бўйича батафсил маълумот беришни интиқлик билан кутамиз», - дея қўшимча қилди компания вакили. 

Kun.uz