“Асосий қомусимиз кафили сифатида Конституция ва қонунларимиз талабларини сўзсиз бажариш, «Инсон қадри учун» деган устувор тамойилни тўла рўёбга чиқариш бундан буён ҳам фаолиятимнинг бош мезони бўлиб қолади”.

Шавкат МИРЗИЁЕВ,

Ўзбекистон Республикаси Президенти

  Бугунги кунда ҳар бир хонадоннинг файзу фариштаси, фарзандларни баркамол инсонлар этиб тарбиялашга муносиб ҳисса қўшаётган аёлларимиз барча ислоҳотларимизда фаол иштирок этмоқдалар. Хотин-қизларга доимий эътибор ва ғамхўрлик кўрсатиш Ўзбекистонда олиб борилаётган давлат сиёсатининг узвий қисмидир.

Шу боис хотин-қизларнинг бандлигини таъминлаш, давлат ва жамият бошқарувидаги ўрни ва нуфузини янада ошириш, уларнинг ўз салоҳиятини намоён этишлари учун шароитларни кенгайтириш, гендер тенглик, оила, оналик ва болаликни ҳимоя қилиш борасидаги ишлар янги босқичга кўтарилиб бормоқда.

Айниқса, яқинда 2022-2026 йилларга мўлжалланган Янги Ўзбекистон тараққиёт стратегиясининг қабул қилиниши том маънода тарихий воқеа бўлди. Ҳаракатлар стратегиясининг мантиқий давоми бўлган ушбу тарихий дастуруламал ҳужжатда яқин ва ўрта истиқболда Ўзбекистоннинг тараққиёт тенденциялари, давлат ва жамият ҳаётининг барча жабҳаларини комплекс ривожлантириш йўналишлари аниқ белгилаб берилган.

Тараққиёт стратегиясининг аҳамияти шундаки, унинг ишлаб чиқилишида мавжуд муаммолар эътиборга олинган ва ечимини кутаётган долзарб вазифалар акс эттирилган. Энг муҳими, ушбу дастурий ҳужжатнинг ишлаб чиқилишида халқимиз фаол иштирок этди. 

Президент Шавкат Мирзиёев бошчилигида 2022 йил 26 январда Ўзбекистон Республикасининг 2022-2026 йилларга мўлжалланган Янги Ўзбекистон Тараққиёт стратегиясини амалга оширишга бағишлаб ўтказилган йиғилишда шу ҳақда атрофлича сўз борди. Давлатимиз раҳбари таъкидлаганидек, «Инсон қадри учун» тамойилини барча ислоҳотларимизнинг бош мезони сифатида белгиладик. «Давлат – инсон учун» деган эзгу ғояни ҳаётга татбиқ этиш мақсадида 2022-2026 йилларга мўлжалланган Янги Ўзбекистоннинг тараққиёт стратегиясини бевосита халқимиз билан маслаҳатлашиб, одамларимизнинг фикр ва таклифлари асосида ишлаб чиқдик». 

Президентимиз Фармони билан тасдиқланган мазкур Тараққиёт стратегиясида Ўзбекистонни кейинги 5 йилда ривожлантириш истиқболлари белгилаб олинган. Бу борада қуйидаги еттита устувор йўналиш бўйича “Инсон қадри учун — 100 та мақсад”ни амалга ошириш кўзда тутилмоқда:

— инсон қадрини юксалтириш ва эркин фуқаролик жамиятини янада ривожлантириш орқали халқпарвар давлат барпо этиш;

— мамлакатимизда адолат ва қонун устуворлиги тамойилларини тараққиётнинг энг асосий ва зарур шартига айлантириш;

— миллий иқтисодиётни жадал ривожлантириш ва юқори ўсиш суръатларини таъминлаш;

— адолатли ижтимоий сиёсат юритиш, инсон капиталини ривожлантириш;

— маънавий тараққиётни таъминлаш ва соҳани янги босқичга олиб чиқиш;

— миллий манфаатлардан келиб чиққан ҳолда умумбашарий муаммоларга ёндашиш;

— мамлакатимиз хавфсизлиги ва мудофаа салоҳиятини кучайтириш, очиқ, прагматик ва фаол ташқи сиёсат олиб бориш.

  Тараққиёт стратегиясини 2022 йилда амалга оширишга доир Давлат дастурида 398 та чора-тадбир белгиланган. Шу қамровдор мақсад ва режаларни молиялаштиришга 2022 йилда умумий қиймати 55 триллион сўм ва 11,7 миллиард доллар миқдорида маблағ йўналтирилади.

Тараққиёт стратегиясининг 69-мақсади “Хотин-қизларни қўллаб-қувватлаш, уларнинг жамият ҳаётидаги фаол иштирокини таъминлаш” деб номланган. Унда, жумладан:

• 2022–2026 йилларда хотин-қизларнинг мамлакат иқтисодий, сиёсий ва ижтимоий ҳаётининг барча жабҳаларида фаоллигини ошириш бўйича Миллий дастур ҳамда уни 2022–2023 йилларда амалга оширишга қаратилган комплекс чора-тадбирлар режасини тасдиқлаш;
• хотин-қизларнинг таълим олишига қўшимча шарт-шароитлар яратиш, илм-фан соҳасида аёлларнинг ўрнини янада ошириш;
• хотин-қизлар ўртасида бизнес кўникмаларини шакллантириш бўйича бепул ўқув амалий курсларини ташкил этиш, имтиёзли кредитлар ва лизинг ажратиш, хотин-қизларни ишга жалб қилган ҳолда кооперация усулида тадбиркорликни йўлга қўйиш;
• “Аёллар дафтари”га киритилган ва жарроҳлик амалиётини ўтказиш лозим бўлган хотин-қизларнинг тиббий муолажа харажатларини қоплаб бериш;
• “Аёллар дафтари” орқали хотин-қизларнинг муаммоларини ҳал этиш амалиётини ўрганиш ва таҳлил қилиш ҳамда орттирилган тажрибадан келиб чиқиб, “Аёллар дафтари”ни юритиш орқали хотин-қизлар муаммоларини тизимли равишда ҳал этиш ва уларни ижтимоий қўллаб-қувватлаш бўйича тартиби ҳамда “Аёллар дафтари”га киритилган хотин-қизларни қўллаб-қувватлаш жамғармаси тўғрисидаги намунавий низом лойиҳаларини ишлаб чиқиш каби вазифалар кўзда тутилган.

 Бундан ташқари, Тараққиёт стратегиясининг 60-мақсадида репродуктив ёшдаги ва ҳомиладор аёллар, болалар учун юқори технологик тиббий ёрдам кўрсатиш бўйича, 85-мақсадда эса, аёллар орасидаги ишсизлик даражасини 2 баробар камайтириш, 80 мингдан зиёд ишсиз хотин-қизни давлат ҳисобидан касб-ҳунарга ўқитиш, хотин-қизларни тадбиркорлик ва ўзини ўзи банд қилиш бўйича комплекс чора-тадбирларни амалга ошириш, ҳудудларда аёллар тадбиркорлигини ривожлантириш дастурини ишлаб чиқиш, ҳар бир ҳудудда “Хотин-қизлар ҳунармандчилик марказлари” ва кластерларни ташкил қилиш масалалари қамраб олинган.

Шу билан бирга, хотин-қизлар тадбиркорлик марказлари фаолиятини такомиллаштириш, минтақавий марказлар очиш чораларини кўриш, тадбиркор хотин-қизлар томонидан ишлаб чиқарилаётган маҳсулотларни реализация қилишга кўмаклашиш ҳамда хотин-қизларни тадбиркорликка ўқитиш ва бизнесга жалб қилиш каби долзарб вазифалар белгилаб берилган.

Биргина мисол: хотин-қизларга тадбиркорликни йўлга қўйиш учун Хотин-қизларни қўллаб-қувватлаш давлат мақсадли жамғармаси ҳисобидан 3 йилгача ва 6 ойгача имтиёзли давр билан йиллик 14 фоиз ставкада 33 миллион сўмгача кредитлар ажратилади. Кредитлар қуйидаги дастурларни:

• Тадбиркорликни ривожлантириш агентлиги ва Бизнес ва тадбиркорлик олий мактаби маъқулланган дастурлар асосидаги ўқув курслари;
• «Ишга марҳамат» мономарказлари, касб-ҳунарга ўқитиш марказлари, маҳаллалардаги касб-ҳунарга ўқитиш масканлари ва Хотин-қизлар тадбиркорлик марказлари ёки нодавлат таълим муассасаларининг касбга ўргатиш ўқув курсларининг махсус ўқитиш дастурларини муваффақиятли тугатган хотин-қизларга берилади.

 Хулоса қилиб айтганда, Тараққиёт стратегияси ва жорий йил бўйича Давлат дастуридан аёлларимизни ҳар томонлама қўллаб-қувватлаш, оналар ва болалар саломатлигини мустаҳкамлаш, уларни бепул дорилар ва витаминлар билан таъминлаш, жисмоний тарбияни ривожлантириш, ёш қизлар таълими, уларни иш билан таъминлаш каби кўплаб масалалар жой олганки, буларнинг барчаси мамлакатимиз хотин-қизлари учун давлат ва жамият томонидан кўрсатилаётган чинакам ғамхўрлик намунасидир.

Ойдин Иброҳимова