31 январь куни Олий Мажлис Қонунчилик палатаси томонидан ишлаб чиқилган «Фуқароларнинг виждон эркинлигини таъминлаш ва диний соҳадаги давлат сиёсати концепцияси» биринчи ўқишда концептуал жиҳатдан маъқулланиб, 9 февралга қадар жамоатчилик муҳокамасига қўйилган эди.

11 февраль куни бўлиб ўтган Олий Мажлис Қонунчилик палатасининг навбатдаги ялпи мажлисида мазкур қонун лойиҳаси ҳамда Концепция лойиҳаси иккинчи ва учинчи ўқишларда қабул қилиниб, Сенатга юборилди. Ҳужжат сенаторлар томонидан тасдиқланиб, президент имзолагач кучга киради.

Маълум қилинишича, концепция лойиҳаси бўйича муҳокамаларда аҳолидан 400 тадан ортиқ изоҳлар, таклиф ва тавсиялар келиб тушган, уларнинг 200 дан ортиғи ижобий. Шунингдек, 6 февраль куни эса Қонунчилик палатасида 16 та конфессия вакиллари билан концепция лойиҳасининг муҳокамасига бағишланган учрашув бўлиб ўтган.

«Концепция лойиҳаси кенг жамоатчиликнинг таклиф-мулоҳазалари асосида янада такомиллаштирилгани алоҳида қайд этилди. Хусусан, фуқароларимиз Жаҳонгир Сафоев, Аҳмаджон Орипов, Амирулла Тўхлибоев, Шахноза Гаффарова ҳамда Қонунчилик палатаси депутатлари томонидан билдирилган таклифлар асосида Концепциянинг 10 дан ортиқ бандларига тегишли ўзгартириш ва қўшимчалар киритилди», — дейилади Олий Мажлис хабарида.

Қуйи палата ялпи мажлисида сўзга чиққан ва савол берган депутатлар, фракция раҳбарларининг барчаси бу ҳужжат жуда муҳимлиги ва «маромига етказиб» ишланганини таъкидлашди. Ҳужжат юзасидан бирорта танқидий таклиф ёки фикрлар билдирилмади, муҳокамаларда қолдирилган танқидий фикрлар ҳам инобатга олинмади. Жами 141 нафар депутат ҳужжат қабул қилинишга рози бўлди, 1 нафари бетараф қолган, 2 киши овоз бермаган. Концепцияни қабул қилишга бирорта ҳам депутат қарши бўлмади.

Маълумот учун, 41 банддан иборат, қонун шаклидаги Концепцияда – диний соҳадаги давлат сиёсатининг 10 та асосий вазифаси, 6 та принцип ва 3 та устувор йўналишлари белгиланган.

Диний соҳадаги давлат сиёсати концепцияси ҳақида ушбу ҳавола орқали батафсил маълумот олишингиз мумкин.

Kun.uz