Бугун инсоният ўз цивилизациясининг шундай бир нуқтасидаки, коммуникация технологияларининг шиддатли ривожланиши баробарида у ахборот эркинлигининг кишилик тарихида мисли кўрилмаган чўққисига етди.

XXI асрнинг иккинчи ўн йиллигида ижтимоий тармоқлар жаҳон медиа маконида фаолият юритиб келаётган анъанавий ОАВ билан шу қадар аралашиб, баъзи ҳолатларда эса умуман қўшилиб кетдики, бунинг натижасида уларни бир-биридан ажратиб кўрсатиш ёки уларни бир-бирларига қарши қўйиш мантиқсиздек туюлмоқда.

Ҳозирги пайтда ер куррасининг қарийб 50 фоиз аҳолиси бирон-бир ижтимоий сайтда фаолдир. Уларнинг айримлари эса бир вақтнинг ўзида бир нечта тармоқларда рўйхатдан ўтган. Бу ўз ўрнида расмий ва норасмий ОАВлар учун алоҳида масъулият юклайди.  

"Шахсий мулоҳаза" лойиҳасининг навбатдаги меҳмони “Янги медиа таълим маркази” нодавлат нотижорат ташкилоти директори, филология фанлари доктори, доцент Беруний Алимовнинг айтишича, бугунги кун журналистлари "журнализм" билан "активизм"нинг фарқини билиб олишлари муҳим. Бундан ташқари журналистлар ўзлари томонидан эълон қилинаётган ҳар бир ахборот учун масъул эканликларини ёдда сақлашлари керак.

М.Турдалиева, А.Аҳмедов (видео), ЎзА