“Таълимга киритилган инвестиция энг муҳим сармоя” деган яхши ибора бор. Дарҳақиқат, таълимга йўналтирилган маблағ мамлакат келажагига қаратилган инвестициядир.

Мамлакатни қудратли, миллатни буюк қиладиган куч ҳам айнан илм-фан, таълим ва тарбия. Шу боис жаҳоннинг етакчи давлатларида таълимни ривожлантириш биринчи галдаги вазифа сифатида белгиланади.

Юртимизда ҳам олий таълим соҳасида замонавий ва оқилона тизим яратилиб, ўқитиш услуби такомиллашмоқда. Хусусан, хориждан етук педагог кадрлар жалб этилиб, илғор тажрибани оммалаштиришга урғу бериляпти.

Маълумки, Ўзбекистон давлат жаҳон тиллари университети хорижий тилларни ўқитиш бўйича етакчи олийгоҳ саналади. Аҳамиятли жиҳати, бу ерда чет тилларини ўргатиш учун кўплаб хорижлик ўқитувчилар жалб қилинган. Биз Таржимонлик факультетида талабаларга араб тилидан сабоқ бериб келаётган мисрлик Набила Набил Токи Қандий билан суҳбатлашдик.

 – Сўзим аввалида бетакрор ва гўзал Ўзбекистонда фаолият олиб бораётганимдан бахтиёрлигимни айтмоқчи эдим. Зеро, ўзбек талабаларининг билим олишга, тил ўрганишга иштиёқи баландлиги мени янада кўпроқ ишлашга, изланишга ундаяпти.

Ишлаш учун айнан Ўзбекистонни танлаганимнинг сабаби шундаки, мамлакатингиз ҳақида кўп маълумотга эгаман. Маданияти, қадрияти, урф-одати бизникига ўхшаш бу юртда ўзимни ҳечам бегона ҳис қилмайман. Ён-атрофимдагилар, танишларим худди қардош дўстларим каби.

Ўзбекистон сўнгги йилларда таълимнинг барча соҳаларига жиддий эътибор қаратаётганига гувоҳман. Масалан, хорижий тилларни ўрганмоқчи бўлганлар учун ўша тил бўйича маҳаллий устозларнинг дарс бериши тизими яхши йўлга қўйилгани таҳсинга лойиқ. Масалан, мисрлик мутахассислар талабаларга араб тилини мукаммал ўргатиш мақсадида бу ерга келиб таълим беряпти.

Ўзбекистон ва Араб давлатлари, жумладан, Миср олий ўқув юртлари билан яқин ҳамкорлик қилиб келади.

Шу ўринда қайд этиш керак, давлатларимиз ўртасидаги муносабат тарихий ва чуқур илдизга эга. Ўтмишдан маълумки, буюк ўзбек алломаси Аҳмад Фарғоний Мисрда яшаб, ўлмас кашфиётлар қилган. Жумладан, аллома бунёд этган, Нил дарёси сувини ўлчайдиган “Миқёси Нил” бугунги кунда ҳам Миср халқи фаровон ҳаётига, давлат тараққиётига хизмат қилмоқда. Бу иншоот қадимийлиги жиҳатидан ислом ёдгорликлари орасида Амри Ибн Осс масжидидан кейинги иккинчи ўринда туради. Қолаверса, Мисрда ўзбек маҳалласи, ўзбек боғи бор.

“Ибн Тулун” Қоҳирадаги энг йирик ва қадимий масжид ҳисобланади. Манбаларда келтирилишича, бу меъморий обиданинг қурилиши ҳам келиб чиқиши ўзбек бўлган инсон номи билан боғлиқ.

Умуман, таълим тизимидаги ҳамда талаба-ўқитувчилар алмашинуви мени оддий бир устоз сифатида жуда хурсанд қилади. Бу жараёнга давлат раҳбарининг шахсан ўзи алоҳида эътибор бераётгани таҳсинга лойиқ.

Президент Шавкат Мирзиёевнинг давлатимизга расмий ташрифи мисрликларни жуда хурсанд қилди. Яқин тарихга назар ташлайдиган бўлсак, 2018 йил Абдулфаттоҳ Ас-Сиси Шавкат Мирзиёев таклифига биноан мамлакатингизга келган эди. Етакчиларнинг бу галги учрашуви эса ўзаро алоқани янада юксак поғонага олиб чиқиши шубҳасиз. Музокара давомида туризм, савдо, таълим сингари йўналишларда ўттизга яқин ҳужжат имзоланди. Ушбу келишувлар ҳар икки томон учун бирдек манфаатли экани аниқ.

Бир сўз билан айтганда, бу бетакрор диёрда ўзимни хорижлик ҳис қилмайман.  Маданиятимиз, урф-одатимиз, динимиз муштарак. Ўзбекистон менинг иккинчи Ватаним. Ўн икки ойдан бери шу заминдаман. Ўтган давр мобайнида кўплаб ислоҳотлар, ижобий ўзгаришларга, нафақат чиройли бинолар қад ростлаётгани, балки ижтимоий-сиёсий, илм-фан, маданият, таълим соҳалари ҳам юксалаётганига гувоҳман.

Гўзал Сатторова ёзиб олди.

ЎзА