Якшанба куни Гаага шаҳрида ўн минглаб одамлар кўчага чиқди. Улар ҳукуматни Исроилга босимни кучайтиришга ва Ғазодаги зўравонликларни тўхтатишга чақирмоқда.  Улар қаршилик рамзи сифатида қизил либослар кийиб кўчаларга чиқишган. Маҳаллий аҳоли Нидерландия ҳукуматининг Ғазо секторидаги ҳарбий амалиёт билан боғлиқ сиёсатига қарши эканликларини шу тарзда намойиш этишмоқда.

Ушбу ҳудудда бундай норозилик тадбири иккинчи марта бўлиб ўтмоқда. Олдин ҳам май ойида Исроилнинг Ғазо секторидаги низосига қарши намойиш бўлган эди, лекин бу сафар намойишга олдингидан кўра жуда кўп киши йиғилган. 

Намойишчилар Гаага марказидан 5 км йўлни босиб ўтиб, рамзий маънодаги “қизил чизиқ”ни белгилашди. Уларнинг фикрича бу чизиқ ҳукуматни Ғазо билан боғлиқ масалаларда кескин ва амалий чора кўришга ундаши керак. Рамзий чизиқ эса энди бошқа кутиш мумкин эмаслигини билдиради. 

Хабарларда таъкидланишича, норозилик йиғини инсон ҳуқуқлари ва инсонпарварлик ташкилотлари ҳамда Чегара билмас шифокорлар ташкилоти томонидан уюштирилган. Уларнинг ҳисоб-китобларига кўра, тадбирда 150 мингдан ортиқ киши иштирок этган. 

– Мен Ғазода содир этилаётган жиноятларга шерик бўлишни хоҳламайман ва шунинг учун намойишга келиб ўз позициямни билдиряпман, -дейди намойишчилардан бири.

Айни пайтда қўшни Бельгияда ҳам камида 75 минг киши кўчага чиққан. Кўпчилик экспертлар бўлаётган воқеаларни Нидерландия расмийларига “аниқ белги” сифатида баҳоламоқда. Уларнинг фикрича, ҳукумат Исроилга босимни кучайтириш учун миллий ва халқаро миқёсда шошилинч чоралар кўриши керак.

Шу билан бирга, БМТнинг қатор агентликлари ва гуманитар ташкилотлар Исроил томонини инсониятга қарши жиноятлар, жумладан, Фаластин аҳолисини этник тозалашда айбламоқда. 

Ўтган ҳафта БМТнинг Фаластин ҳудудлари бўйича мустақил халқаро тергов комиссияси таҳлилчилари Исроилни инсониятга қарши жиноят содир этганликда айблаб, “қирғин қилиш” ва мактаблар, диний муассасаларда бошпана топган тинч аҳолини қасддан нишонга олганликда айблаган ҳисобот эълон қилди. 

К.Бекжонов, ЎзА