Самарқандда Ёш парламент аъзоларининг XII глобал конференцияси ўз ишини давом эттирмоқда.
Нуфузли анжуманда Ўзбекистон Республикаси Президенти Шавкат Мирзиёевнинг глобал конференция иштирокчиларига йўллаган табриги ўқиб эшиттирилганидан кейин Олий Мажлис Сенати Раиси Танзила Норбоева ёш парламентарийларни қутлаш билан бирга, ўз кириш сўзини тақдим этди.
– Ўзбекистон Республикаси Президенти Шавкат Мирзиёевнинг сизларга – ёш парламентарийларга йўллаган мурожаатини тингладик, – деди Т.Норбоева. – Унда билдирилган ғоя ва ташаббуслар давлатимиз раҳбарининг ёшларни қўллаб-қувватлаш, уларнинг сиёсий ва ижтимоий фаоллигини ошириш ҳамда парламент дипломатиясини ривожлантиришга бўлган қатъий садоқатини яна бир бор намоён этди. Ушбу мурожаат конференциямиз муҳокамалари учун муҳим сиёсий йўналишни белгилаб беради, деб умид қиламиз. Бугун бу ерда дунёнинг турли минтақаларидан келган ёш сиёсатчилар, парламентлар ва халқаро ташкилотлар вакилларининг жам бўлгани ёш авлод глобал жараёнларнинг кузатувчиси эмас, балки уларга таъсир кўрсатишга қодир куч эканини кўрсатади.
Бугунги мураккаб дунёда ишонч ва мулоқотга эҳтиёж ҳар қачонгидан ҳам юқори эканига эътибор қаратилди. Парламент дипломатияси мулоқот эшикларини очиқ сақлаши, ёш парламентарийлар эса унга янги фикр, жасорат ва келажак учун масъулият олиб кириши лозим.
Конференциямизнинг “Нотинч даврларда барча учун инсон ҳуқуқлари, адолат ва қадр-қимматни тиклаш” мавзуси бугунги даврнинг энг муҳим сиёсий саволини ўртага қўяди. Нотинч даврларда инсон ҳуқуқлари ўз аҳамиятини йўқотмайди. Аксинча, айнан шундай мураккаб шароитда давлатлар, парламентлар ва сиёсатчиларнинг инсон қадр-қимматига садоқати синовдан ўтади.
“Қуролли можаролар ёшларни хавфсиз ҳаётдан, иқтисодий қийинчиликлар эса таълим ва муносиб меҳнат имкониятидан маҳрум этмоқда. Рақамли ва иқлим билан боғлиқ хатарлар ҳам уларнинг бугунги ҳаёти ва келажагига бевосита таъсир кўрсатмоқда. Лекин, бугун биз муаммоларни санаб ўтиш учун эмас, самарали ечимлар юзасидан таклифлар ишлаб чиқиш учун йиғилдик.
Асосий савол шу: парламентлар инсон ҳуқуқлари ва адолатни кундалик ҳаётда сезиладиган натижага қандай айлантиради? Чунки инсон қадр-қиммати фақат халқаро ҳужжат ёки қонун моддаси эмас. У ёш инсоннинг таълим олиши, иш топиши, хавфсиз яшаши, ўз фикрини эркин билдириши ва давлат қарорларига таъсир кўрсата олишида намоён бўлади. Ёшларни эшитишнинг ўзи етарли эмас, улар билан бирга энг керакли қарорлар қабул қилиш муҳимдир”, деди Сенат Раиси.
Норгул Абдураимова,
Алишер Исроилов (сурат),
ЎзА