Туркия ҳукумати озиқ-овқат чиқиндиларини камайтириш мақсадида меҳмонхоналарда «Швеция столи» концепциясидан воз кечиш имкониятини кўриб чиқади. Президент Ражаб Тоййиб Эрдўған учун бундай ҳисоботни Қишлоқ хўжалиги ва озиқ-овқат сиёсати бўйича кенгаш тайёрламоқда, деб ёзди Sabah.

Ташаббус муаллифлари «барчаси киритилган» (all inclusive) тизимини «а-ля карта» (à la carte) форматига алмаштиришни таклиф қилмоқда, бунда одам «қанча ейиши мумкин бўлса, шунча овқат»га буюртма беради.

Кенгаш аъзоси, Рестораторлар уюшмаси президенти Рамазон Бингел сўзларига кўра, «Швеция столи» тизими бўйича таомларнинг 50 фоизи, жумладан, тайёр бўлганидан кейин ҳам исроф бўлади.

«Тарелкага солинган, лекин ҳатто татиб кўрилмаган овқат ахлатга ташланмоқди», деб аниқлик киритди у.

Умуман олганда, Туркия чиқиндиларнинг олдини олиш жамғармаси маълумотларига кўра, назоратсиз истеъмол туфайли мамлакатда ҳар йили 23 миллион тоннагача маҳсулот - асосан сабзавотлар, мевалар ва нон чиқиндига ташлаб юборилади. Бу одам бошига қайта ҳисоблаганда йилига 102 кг озиқ-овқат чиқиндиси демакдир.

Бундан ташқари, мева ва сабзавотларнинг қарийб 35 фоизи дастурхонга етиб бормасдан йўқолади. Бингел ҳисоб-китобларига кўра, бу рақамлар икки баравар кўп бўлиши мумкин. Унинг қўшимча қилишича, ҳисобот барча маълумотлар билан президент Эрдўғанга яқин икки ой ичида етиб боради.

Апрель ойида турк отельерлари «Швеция столи»ни чеклашни таклиф қилган эди. «Барчаси киритилган» тизими исрофгарчиликни рағбатлантирмаслиги керак, деди Профессионал отельерлар уюшмаси раҳбари Ҳоқон Соатчиўғли.

Kun.uz