Коррупцияга қарши курашиш миллий кенгаши йиғилишида давлатимиз раҳбари коррупцияга қарши курашишда жамоатчилик вакиллари ва нодавлат ташкилотлар ролини кучайтиришга алоҳида эътибор қаратди.

Бу каби ташаббус ва амалий чоралар халқаро ҳамжамият томонидан ҳам алоҳида эътироф этилмоқда. Хусусан, Иқтисодий ҳамкорлик ва тараққиёт ташкилоти томонидан Истанбул ҳаракатлар режаси 5-босқич мониторингининг натижаларида Ўзбекистонда коррупцияга қарши курашиш бўйича давлат сиёсатини шакллантиришда, дастурий ҳужжатлар ишлаб чиқишда, муҳим қарорлар қабул қилишда жамоатчилик иштироки энг юқори даражада, деб баҳоланган. 

Коррупцияга қарши курашиш агентлиги ҳам ННТ вакилларини мунтазам равишда коррупцияга қарши курашиш ишига кенг жалб қилмоқда. Бу борада Агентлик ва жамоатчилик ўртасида кўприк вазифасини бажариш мақсадида Жамоатчилик кенгаши ташкил этилган. Ушбу кенгашнинг 25 нафар аъзоси бўлса, уларнинг 13 нафари ННТ вакиллари ҳисобланади. 

Бу фикрлар Коррупцияга қарши курашиш агентлигида нодавлат нотижорат ташкилотлари вакиллари учун ўтказилган семинарда қайд этилди. 

Болтиқ оммавий ахборот воситаларини ривожлантириш маркази ва Рига олий ҳуқуқшунослик мактаби ҳамкорлигида ташкил этилган тадбирда маҳаллий ва халқаро экспертлар томонидан коррупцияга қарши курашишда ННТларнинг роли бўйича тушунчалар берилди. 

Мазкур тадбир Европа Иттифоқи ва Германия иқтисодий ҳамкорлик ва тараққиёт федерал вазирлиги (BMZ) томонидан молиялаштирилаётган "Ўзбекистонда давлат бошқарувини такомиллаштириш, коррупциянинг кенг қамровли олдини олиш" лойиҳаси доирасида ташкил этилди. 

Коррупцияга қарши курашиш жараёнларига фуқаролик жамияти институтлари, хусусан, ННТ вакилларини кенг жалб қилиш, соҳадаги ислоҳотлар ижросини таъминлашда уларнинг иштирокини кучайтириш ва фаоллигини ошириш, шунингдек, бу йўналишда ўзаро ҳамкорлик алоқаларини янада мустаҳкамлаш масалалари муҳокама қилинди. 

ННТлар учун коррупцияга қарши курашишда янги усул ва воситалар, ушбу жараёнларда хорижий давлатларнинг илғор тажрибалари кўриб чиқилди. 

ННТлар билан биргаликда ижтимоий шериклик ва жамоатчилик назоратини амалга ошириш асосида коррупциянинг олдини олиш ва унга қарши курашишга оид ижтимоий лойиҳаларни ҳаётга татбиқ этиш масалалари бўйича фикр алмашилди. 

Н.Абдураимова, ЎзА