22 июнь куни Наманган вилоятида “Қийноққа солишга қарши курашиш: халқаро амалиёт ва миллий тажриба” мавзусидаги ўқув курси бошланди. Машғулотлар Инсон ҳуқуқлари бўйича Ўзбекистон Республикаси Миллий маркази ташаббуси билан Ўзбекистон Республикаси Бош прокуратураси ҳамда Ички ишлар вазирлиги ҳамкорлигида ташкил этилди.

Машғулотлар аввалида Олий Мажлис Қонунчилик палатаси Спикерининг биринчи ўринбосари, Инсон ҳуқуқлари бўйича Ўзбекистон Республикаси Миллий маркази директори, академик Акмал Саидов онлайн видеомурожаат йўллаб, ўқув курсидан кўзланган устувор мақсад ва вазифаларига тўхталди.  

Ўқув курси дастури доирасида бир қатор долзарб мавзуларда маъруза ва амалий машғулотлар ўтказиш назарда тутилган. Бу ўринда, хусусан, “Инсон ҳуқуқлари соҳасидаги халқаро стандартлар, асосий тамойиллар”, “Мигрантлар ва апатридларга нисбатан қийноққа қарши курашишнинг хориж тажрибаси”, “Нельсон Мандела қоидаларининг мазмун-моҳияти”, “Қийноқ ҳамда муомала ва жазолашнинг қаттиқ, шафқатсиз, инсонийликка зид ёки қадр-қимматни камситувчи турларига қарши конвенциянинг мазмун-моҳияти”, “Қийноққа қарши конвенцияга оид Факультатив протокол”, Қийноқларнинг олдини олишга оид миллий превентив механизмлар: халқаро тажриба ва миллий амалиёт”, “Ушлаб туриш, қамоққа олишга оид халқаро стандартлар, маҳбуслар ҳуқуқларини таъминлаш кафолатлари” мавзуларидаги машғулотлар ҳақида сўз бормоқда.

Ўқув курсида Ҳуқуқни муҳофаза қилиш академияси, Давлат ва ҳуқуқ институти, Ички ишлар вазирлигининг Академияси ва Малака ошириш институти раҳбарияти ҳамда профессор-ўқитувчилари ўз маърузалари билан иштирок этмоқда.

Машғулотларда Наманган вилояти прокуратурасидан 10 нафар ва ички ишлар тизимидан 50 нафар ходим тингловчи сифатида қатнашмоқда.

Машғулотлар 23 июнь куни якунига етади.

Инсон ҳуқуқлари бўйича
Ўзбекистон Республикаси
Миллий марказининг
матбуот хизмати