10 декабрь – Халқаро инсон ҳуқуқлари куни

Одам Ато – одамларнинг аввали, салом!

Момо Ҳавво – оламнинг илк аёли, салом!

Аҳли инсон – коинотнинг сарвари, салом!

Башарият – Она Ернинг гавҳари, салом!

Нақарот:

Инсонга хос ҳақ-ҳуқуқни туймоқлик создир,

инсон қадрин жой-жойига қўймоқлик создир.

Мен – инсонман. Сен – инсонсан. У – инсон эрур;

бир-биримиз инсон бўлиб суймоқлик создир.

Қанча-қанча салтанатни кўрди бу замин.

Шоҳу гадо – баридан ҳол сўрди бу замин.

Қайта-қайта Ҳақ – ҳақиқат томон бурди юз,

адолатнинг меҳваридан юрди бу замин.

Нақарот:

Инсонга хос ҳақ-ҳуқуқни туймоқлик создир,

инсон қадрин жой-жойига қўймоқлик создир.

Мен – инсонман. Сен – инсонсан. У – инсон эрур;

бир-биримиз инсон бўлиб суймоқлик создир.

Кўп илоҳий манбалардан мақсад бир – Инсон.

Инсон сўзин олтмиш беш бор зикр этган Қуръон.

Сен – азизсан, Сен – мукаррам, Сен – жаннатий зот,

Эркинг, қадринг, ҳақ-ҳуқуқинг юксак бегумон.

Нақарот:

Инсонга хос ҳақ-ҳуқуқни туймоқлик создир,

инсон қадрин жой-жойига қўймоқлик создир.

Мен – инсонман. Сен – инсонсан. У – инсон эрур;

бир-биримиз инсон бўлиб суймоқлик создир.

Инсон – шаънинг, шавкатинг ва номусинг буюк,

шу неъматлар кафолати – Қомусинг буюк.

Инсон қадрин улуғлашга азму жазм этган

Дастуринг – соз, ўзинг буюк ва сўзинг буюк!

 Нақарот:

Инсонга хос ҳақ-ҳуқуқни туймоқлик создир,

инсон қадрин жой-жойига қўймоқлик создир.

Мен – инсонман, Сен – инсонсан. У – инсон эрур,

бир-биримиз инсон бўлиб суймоқлик создир.

Ғулом МИРЗО