Сариосиё тумани ҳокими ўринбосари Дилфуза Тошматова маҳаллалардаги фаолларни пахта теримига мажбурлагани ҳақида хабарга Сурхондарё вилояти ҳокимлиги ҳолат ўрганилаётгани ҳақида баёнот берганди.

Камбағалликни қисқартириш ва бандлик вазирлиги ҳам мазкур ҳолат бўйича ўрганиш натижаларини эълон қилди.

Ҳоким ўринбосари ҳар бир маҳалла фаолига беш нафардан одам топиб, уларни пахта теримига олиб чиқишга мажбурлаган.

“Сариосиё тумани ҳокими ўринбосарининг маҳалла фаолларига пахта теримига 5-10 нафардан фуқароларни мажбурий жалб қилиш ҳақида топшириқ бергани тасдиғини топди. Унга нисбатан Маъмурий жавобгарлик тўғрисидаги кодексининг 51-моддаси 1-қисми билан базавий ҳисоблаш миқдорининг 50 баравари (20,6 млн сўм-таҳр.) миқдорида жарима қўлланилди”, — дейилади вазирлик баёнотида.