Тошкентда 2025 йил 5-9 апрель кунлари Парламентлараро Иттифоқнинг 150-юбилей ассамблеяси бўлиб ўтди.

ЎзА мухбири Ассамблея якунлари ҳақида Парламентлараро иттифоқ Президенти Тулия Эксон билан суҳбатлашди:   

– Парламентлараро иттифоқнинг 150-ассамблеяси ниҳоясига етди. Бу муҳим йиғилишнинг Ўзбекистонда бўлиб ўтганидан жуда мамнунмиз.   

Бу ерда биз жуда кўп нарсаларни ўргандик, катта тажриба орттирдик. Ўзбекистон Республикаси Президенти билан бўлган мулоқотимиз ва мамлакатингиз етакчисининг нутқи ассамблея иштирокчиларида жуда катта таассурот қолдирди. Жаноби олийлари ижтимоий инклюзивлик, фуқаролик институтлари, шу жумладан, парламентларни мустаҳкамлаш масалалари ҳақида муҳим фикрларни билдирди.   

Ижтимоий адолат ҳақида ҳам тўхталиб ўтилди. Булар барқарор тинчлик ва хавфсизлик билан чамбарчас боғлиқ. Чунки, тинчлик бўлмаса, одамлар ўз давлатини ривожланган, деб ҳисоблай олмайди.  

Тошкент декларацияси қабул қилинди. Гувоҳи бўлганингиздек, бу декларация олқишлар билан кутиб олинди. Барқарор ривожланиш мақсадлари, ижтимоий адолат ва ижтимоий тараққиёт, аёллар ва ёшларнинг жамиятдаги ўрни, гендер тенглиги каби масалалар декларацияда алоҳида ўрин олди.   

Парламентда аёллар сонининг ошгани, ёшларнинг ҳам парламент ишларида фаол иштирок этаётганини кўрдик.   

Президентингизнинг нутқи Тошкент декларациясининг асосларидан бирига айлангани биз учун фахрдир. Шу сабабли, Тошкент доимо бизнинг тарихимизда алоҳида ўрин эгаллайди. Фақат Тошкент эмас, балки Самарқанд ва бошқа шаҳарларингиздаги инсонлар бизни жуда илиқ кутиб олди. Ўзбекистон халқи биз учун доимий эсда қоладиган меҳр-оқибат кўрсатди. Бу воқеалар ажойиб ва тарихий аҳамият касб этди. Ўзбекистон халқига катта раҳмат. Президентингизга, Сенат Раисига чексиз миннатдорлик билдираман.   

Норгул Абдураимова, ЎзА