Бутун дунё, жумладан Европа минтақасидаги муҳим воқеа-ҳодисаларни батафсил шарҳлаб борадиган машҳур нашр – “European Politics Review” журнали давлатимиз раҳбарининг Францияга давлат ташрифи хусусида махсус мақола эълон қилди.

Материалда Шавкат Мирзиёев ва Эммануэль Макрон Елисей саройида музокара ўтказгани, давлат раҳбарлари тор доирада ва делегациялар иштирокида кўп қиррали ўзаро алоқаларни янада ривожлантириш масалаларини батафсил муҳокама қилганига эътибор қаратилган:

– Ўтган йил икки давлат савдо айланмаси илк бор 1 миллиард евродан ошди, қўшма корхоналар сони тўрт баробар кўпайди. Orano, EDF, Total, SUEZ, Voltalia, Veolia каби йирик компаниялар Ўзбекистонда муваффақиятли фаолият юритмоқда. Франция тараққиёт агентлиги билан ҳамкорлик фаол босқичга кирган, янги ҳамкорлик дастури қабул қилинган.

Муаллиф Франциянинг турли шаҳарларида ўтказилаётган қўшма тадбирлар, шунингдек мазкур ташриф арафасида ташкил этилган тиббиёт форуми, фан ва таълим бўйича конференция, Ўзбекистоннинг туризм салоҳияти ва маданияти тақдимотига алоҳида урғу қаратган.

Минтақалараро ҳамкорликни ривожлантириш мақсадида келгуси йил Самарқандда Ўзбекистон ва Франция минтақалар форумини ўтказиш бўйича келишувга эришилгани ҳамда Президентлар қайд этган бошқа муҳим масалалар шарҳланган.

Таъкидлаш жоиз, “European Politics Review” нашри минглаб манбалардан олинган янгиликларни тақдим этиш учун илғор интеллектуал тизимлардан фойдаланади. Глобал тармоқ таркибидаги таҳририят жаҳон ахборот маконидан муносиб ўрин эгаллаган.

Беҳруз Худойбердиев, ЎзА мухбири