25 февраль куни Инсон ҳуқуқлари бўйича Ўзбекистон Республикаси Миллий маркази директори Акмал Саидов Женева шаҳридаги Миллатлар саройида бўлиб ўтган БМТ Инсон ҳуқуқлари бўйича кенгашининг 61-сессияси Олий даражадаги сегментида онлайн тарзда иштирок этди.

Тадбирнинг очилиш маросимида Бирлашган Миллатлар Ташкилоти Бош котиби Антониу Гутерриш, БМТ Бош Ассамблеяси Раиси Анналена Бербок, БМТнинг Инсон ҳуқуқлари бўйича Олий комиссари Фолькер Тюрк, шунингдек, давлат раҳбарлари, ташқи ишлар вазирлари ва БМТга аъзо давлатлар делегациялари раҳбарлари сўзга чиқдилар.

Ўзбекистон Республикаси делегацияси раҳбари ўз нутқида инсон ҳуқуқ ва эркинликларини таъминлаш ҳамда ҳимоя қилиш соҳасидаги “Янги Ўзбекистон” концепциясини тақдим этди. Мамлакатимиз вакили Ўзбекистоннинг БМТ Низоми принципларига, шунингдек, глобал таҳдидлар шароитида халқаро ҳамкорлик ва бирдамликни мустаҳкамлашга содиқлиги ўзгармаслигини таъкидлади.

Мамлакатда Ўзбекистон Республикаси Президенти Шавкат Мирзиёев раҳбарлигида изчил ислоҳотлар амалга оширилаётгани қайд этилди. Янгиланган “Ўзбекистон – 2030” стратегияси Барқарор ривожланиш мақсадларига эришиш бўйича миллий “йўл харитаси” сифатида кўрилмоқда ҳамда у ижтимоий адолатни таъминлаш, қонун устуворлигини мустаҳкамлаш ва аҳоли турмуш сифатини оширишга қаратилган.

Шунингдек, 2026–2030 йилларга мўлжалланган Инсон ҳуқуқлари бўйича иккинчи Миллий стратегия лойиҳаси тайёрланаётгани, шунингдек, БМТ Жаҳон дастурининг Бешинчи босқичи доирасида Инсон ҳуқуқлари соҳасидаги таълим бўйича Миллий дастур ишлаб чиқилаётгани ҳақида маълум қилинди.

БМТ Бош котибининг “UN-80” ташаббуси ҳамда БМТ Олий комиссарининг Инсон ҳуқуқлари бўйича глобал альянс яратиш таклифи қўллаб-қувватланиши алоҳида таъкидланди.

Ўзбекистон 2026 йилда Инсон ҳуқуқлари бўйича халқаро пактларнинг 60 йиллигига бағишланган Инсон ҳуқуқлари бўйича бешинчи Самарқанд форуми ҳамда Ёш парламентарийларнинг глобал конференциясига мезбонлик қилади.

Маълумот учун: БМТ Инсон ҳуқуқлари бўйича кенгашининг навбатдаги олтмиш биринчи сессияси 2026 йил 23 февралда очилди. Сессия ишида 100 дан ортиқ давлат вакиллари иштирок этмоқда. Кун тартибидан 29 та интерфаол мулоқот, рақамли технологияларга ва Дурбан декларациясининг бир йиллигига бағишланган мавзули ялпи мажлислар ҳамда айрим мамлакатлар ва минтақалардаги вазиятлар муҳокамаси каби масалалар ўрин олган. Сессия иши 2026 йил 31 мартга қадар давом этади.

Инсон ҳуқуқлари бўйича

Ўзбекистон Республикаси

Миллий марказининг

матбуот хизмати