Жаҳон соғлиқни сақлаш ташкилоти БМТ Бош Ассамблеяси томонидан пандемиянинг олдини олиш, унга тайёргарлик кўриш ва унга қарши курашиш (PPPR) бўйича Сиёсий декларация қабул қилинганини мамнуният билан олқишлайди. Мазкур ҳужжат келажак авлодларни глобал миқёсдаги хавфлар ва вайронкор таъсирлардан ҳимоя қилиш учун зарур бўлган халқаро бирдамлик ва масъулиятни яна бир бор яққол намоён этди.
ЖССТ Бош директори, доктор Тедрос Гебрейесуснинг таъкидлашича, дунё “COVID-19” пандемиясидан кейин катта синовлар ва тажрибани босиб ўтди. Шу боис ташкилот барча мамлакатларни ўз зиммаларига олган мажбуриятларини, хусусан, Патогенлардан фойдаланиш ва фойдани тақсимлаш тизими (PABS) иловаси бўйича музокараларни якунлаш ҳамда ЖССТ Пандемия битимини имзолаш учун очиш, уни ратификация қилиш жараёнларини жадаллаштириб, халқаро ҳуқуқ сифатида кучга киритишга чақирди.
БМТга аъзо давлатлар мазкур Декларацияни жорий йил 25 сентябрь куни бўлиб ўтган юқори даражадаги мажлисда кўриб чиқиб, якуний қабул қилиш учун Бош Ассамблеяга тақдим этган эди. Унда пандемия таҳдидларининг олдини олиш, уларни ўз вақтида аниқлаш ва тезкор чора кўриш бўйича миллий, минтақавий ҳамда глобал салоҳиятни мустаҳкамлаш учун барқарор инвестициялар ва амалий саъй-ҳаракатлар зарурлиги қайд этилган.
Ҳужжатда соғлиқни сақлаш масалаларини иқтисодий ривожланиш ва хавфсизлик императиви сифатида баҳолаб, тармоқлараро мувофиқлаштирилган ёндашувни қўллаш муҳимлиги алоҳида кўрсатилган. Шунингдек, кузатув тизимларини такомиллаштириш, миллий имкониятларни кенгайтириш, янгиланган Халқаро соғлиқни сақлаш қоидаларини ҳаётга татбиқ этиш ҳамда маҳаллий ва минтақавий ишлаб чиқариш ҳамда илмий-тадқиқот салоҳиятини ошириш устувор вазифа сифатида белгиланган.
Моҳигул Қосимова,
ЎзА