18 март куни Инсон ҳуқуқлари бўйича Ўзбекистон Республикаси Миллий марказида Миллий марказ раҳбарияти билан Европа Иттифоқининг GSP+ дастури бўйича мониторинг миссияси делегацияси ўртасида учрашув бўлиб ўтди.

Учрашув GSP+ дастурини амалга ошириш доирасида Ўзбекистон Республикасининг инсон ҳуқуқларини ҳимоя қилиш ва таъминлаш соҳасидаги давлат сиёсатининг асосий жиҳатларини муҳокама қилишга бағишланди. Инсон ҳуқуқлари бўйича Ўзбекистон Республикаси Миллий маркази директори ўринбосари Д.Муратова Европа Комиссиясининг Савдо департаменти бошлиғи А. Бойчук ва делегация аъзоларини кутиб олди.

Учрашувда Европа Иттифоқи делегацияси миссияси раҳбари ўринбосари М.Кацераускис, Европа Иттифоқи делегацияси маслаҳатчилари, Европа Комиссияси, Европа ташқи ишлар хизмати вакиллари, шунингдек, Миллий марказ ва Олий Мажлиснинг Инсон ҳуқуқлари бўйича вакили Котибияти масъул ходимлари иштирок этди.

Д.Муратова ўз сўзининг бошида Ўзбекистонда инсон ҳуқуқлари соҳасида амалга оширилаётган изчил ислоҳотлар ҳақида маълумот берди. Шунингдек, 2030 йилгача мўлжалланган Инсон ҳуқуқлари бўйича Ўзбекистон Республикаси Миллий стратегияси лойиҳаси ишлаб чиқилаётгани эълон қилинди. Миллий марказнинг мамлакатимизнинг инсон ҳуқуқлари соҳасидаги халқаро мажбуриятларини бажаришга кўмаклашиш борасидаги фаолиятига алоҳида эътибор қаратилди.

Ўзбекистон Республикаси Олий Мажлисининг Инсон ҳуқуқлари бўйича вакили (омбудсман) Котибияти мудири Т.Ҳайитов 2024 йил 15 ноябрдаги қонун билан белгиланган Омбудсман институтининг ҳуқуқий мақоми ҳақида маълумот берди. У фуқароларнинг ҳуқуқ ва эркинликларини таъминлашда Омбудсман институтининг ваколатлари кенгайтирилгани, унинг ҳудудлардаги фаолияти ва қийноқларнинг олдини олиш бўйича ишлар кучайтирилганини таъкидлади.

Европа Иттифоқи делегацияси раҳбари А.Бойчук Европа Иттифоқини қизиқтирган бир қатор масалаларга тўхталди. Жумладан, фуқароларни мажбурий кўчириш ҳолатлари, нодавлат ташкилотларни рўйхатдан ўтказиш тартиби, БМТнинг Қийноқларга қарши конвенциясига Факультатив протоколни имплементация ва ратификация қилиш соҳасидаги ишларнинг ҳолати хусусида фикр юритилди.

Европа томонининг барча саволларига батафсил жавоблар берилди.

Учрашув якунида Европа Иттифоқи делегацияси тақдим этилган тўлиқ маълумотлар ва барча саволларга атрофлича жавоблар учун миннатдорчилик билдирди.

Инсон ҳуқуқлари бўйича

Ўзбекистон Республикаси

Миллий марказининг

матбуот хизмати