8 апрель куни Тошкент шаҳрида Инсон ҳуқуқлари бўйича Ўзбекистон Республикаси Миллий маркази директори А. Саидов БМТ Бош котибининг Болаларга нисбатан зўравонлик масалалари бўйича махсус вакили Н. Маала билан ишчи тушлик ўтказди.

Муҳокаманинг асосий мавзуси Ўзбекистонда болалар ҳуқуқларини ҳимоя қилиш тизимини мустаҳкамлаш масаласи бўлди.

Иштирокчилар Ўзбекистоннинг мустаҳкам қонунчилик базаси ва ривожланган институтлар тармоғига асосланган ҳолда болалар ҳуқуқларини таъминлашга бўлган комплекс ёндашувини кўриб чиқдилар. Таълим орқали ҳуқуқий саводхонликни ошириш ва халқаро стандартларга риоя қилиш бўйича саъй-ҳаракатлар, шу жумладан БМТ шартномавий органларининг тавсияларини амалга ошириш борасидаги ишлар қайд этилди.

Парламент назорати ва вояга етмаганлар ҳуқуқларини ҳимоя қилишнинг асосий механизми сифатида Болалар омбудсмани институтининг фаолияти ва ривожланишига алоҳида эътибор қаратилди. Ушбу институтга бўлган ишончнинг ортиши, мурожаатлар сонининг кўпайиши, жумладан болаларнинг бевосита мурожаат қилишлари, шунингдек, бутун мамлакат бўйлаб унинг фаолиятининг амалий жиҳатлари, шикоятларни кўриб чиқиш ва мониторинг ўтказиш масалалари муҳокама қилинди.

Суҳбат давомида инсон ҳуқуқлари институтларининг мустақиллиги, шикоятларни кўриб чиқишнинг самарали механизмлари тўғрисида фикр юритилди. Айниқса, зўравонлик ҳолатларида, шунингдек қонун билан муаммога дуч келган болаларнинг ҳуқуқларини таъминлаш ва реабилитация қилиш масалаларига алоҳида эътибор қаратилди.

БМТнинг махсус вакили Ўзбекистон томонидан амалга оширилаётган чора-тадбирларни ижобий баҳолаб, келгусида ҳамкорликни давом эттиришга тайёрлигини билдирди. Учрашув мамлакатда ҳар бир боланинг ҳуқуқлари ва энг яхши манфаатларини ҳимоя қилиш механизмларини такомиллаштириш борасида ўзаро интилиш мавжудлигини тасдиқлади.

 Инсон ҳуқуқлари бўйича

Ўзбекистон Республикаси

Миллий марказининг

матбуот хизмати

Ўзбекистон Республикаси Олий Мажлиси Қонунчилик палатаси