2025 йил 22 октябрь куни Россия Фанлар академиясининг Давлат ва ҳуқуқ институтида “Замонавий қиёсий ҳуқуқшунослик: янги фикрларни излаш йўлида” мавзусида халқаро илмий конференция бўлиб ўтди.

Тадбирда Россия Фанлар академиясининг хорижий аъзоси, Ўзбекистон Республикаси Фанлар академияси академиги, Инсон ҳуқуқлари бўйича Ўзбекистон Республикаси Миллий маркази директори А. Х. Саидов, Россия Фанлар академияси Давлат ва ҳуқуқ институти директори, академик А. Н. Савенков, Россия Фанлар академияси академиги А. Г. Лисицын-Светланов, Ўзбекистон Республикаси Фанлар академияси Давлат ва ҳуқуқ институти директори, юридик фанлар доктори М. Т. Турғунов, шунингдек, мамлакатимизнинг Россиядаги элчихонаси вакиллари, етакчи маҳаллий ва хорижий олимлар, давлат ҳокимияти органлари мутасаддилари ҳамда амалиётчи ҳуқуқшунослар иштирок этди.

Конференцияда замонавий қиёсий ҳуқуқшуносликнинг долзарб масалалари, шу жумладан ҳуқуқий институтларнинг ривожланиши, қиёсий-ҳуқуқий тадқиқотларнинг институционаллашуви, минтақавий ва миллий қиёсий ҳуқуқшунослик мактабларининг ўзаро ҳамкорлиги истиқболлари муҳокама қилинди.      

Анжуман доирасида Инсон ҳуқуқлари бўйича Ўзбекистон Республикаси Миллий маркази директори, академик Акмал Саидов “Россия Фанлар академияси Давлат ва ҳуқуқ институтининг 100 йиллиги” фахрий медали билан тақдирланди.

Шунингдек, конференция якунида Россия Фанлар академиясининг Давлат ва ҳуқуқ институти ҳамда Ўзбекистон Республикаси Фанлар академиясининг Давлат ва ҳуқуқ институти ўртасида илмий ҳамкорлик тўғрисида меморандум имзоланди.

Меморандумда юридик фанлар соҳасида илмий ҳамкорликни ривожлантириш, биргаликда қўшма илмий тадқиқот лойиҳаларини амалга ошириш, илмий тадқиқотчиларнинг ўзаро тажриба алмашинувини янада фаоллаштириш каби вазифалар белгиланган.

Инсон ҳуқуқлари бўйича

Ўзбекистон Республикаси

Миллий марказининг

матбуот хизмати