“Cybernet AI ишланмаси туркий тиллар гуруҳи мамлакатларига ўз она тилларида рақамли хизматлар ва мижозларга хизмат кўрсатишни сунъий интеллектдан фойдаланган ҳолда сифатни йўқотмай ва арзон нархда кенгайтириш имкониятини беради. Қозоғистон учун бу глобал сунъий интеллект ечимлари истеъмолчиси ролидан халқаро миқёсда рақобатбардош бўлган ўз технологияларини ишлаб чиқувчи мавқейига кўтарилишни англатади”, дейди Astana Hub бошқарувчи директори Танат Ускембаев.

​Модель қозоқ, турк, ўзбек, қирғиз, озарбайжон ва татар тиллари асосида яратилган бўлиб, мижозларнинг бизнес мулоқотларида ва давлат хизматларидан фойдаланишда кенг тарқалган формат - аралаш туркча-русча нутқни ҳам тўғри таний олади.

Шу пайтгача Марказий Осиё минтақаси давлатлари асосан инглиз тилига мўлжалланган халқаро АSR моделларидан фойдаланишга мажбур эди. Бундай ечимлар туркий фонетика, талаффуз ва аралаш нутқни етарлича ҳисобга олмагани сабабли овозли сунъий интеллект хизматларининг сифатини чеклаб келган.

“Биз онгли равишда инглиз тилидаги моделларни мослаштириш ғоясидан воз кечдик ва жонли, аралаш сўзлашув тилини дастлаб тушунадиган АSR моделини яратдик. Бу ишланма шунчаки навбатдаги технологик маҳсулот эмас, балки сунъий интеллектнинг маҳаллий экотизимини ва технологик мустақиллигини шакллантиришга қўшилган ҳиссадир”, дейди Cybernet AI компаниясининг техник директори Рашид Исмаилов.

​Янги АSR модели катта ҳажмдаги овозли алоқалар билан ишлайдиган корхоналар - банклар ва молия ташкилотлари, телекоммуникация операторлари, турли даражадаги алоқа марказлари, логистика ва хизмат кўрсатиш компаниялари, аҳолига хизмат кўрсатувчи давлат тузилмаларига мўлжалланган.

Модель ишлаб чиқувчиларнинг фикрича, у мижозларни қўллаб-қувватлаш каналларидаги харажатларни камайтиришга ёрдам беради, хизмат кўрсатишнинг энг кўп талаб қилинадиган овозли форматда узлуксиз мавжудлигини таъминлайди.

Модель шовқинга, талаффуз хусусиятларига ва бир гапда тилларни алмаштиришга чидамли бўлиб, финтехдан тортиб давлат хизматларигача бўлган турли соҳаларда юқори аниқликни намойиш этади.