Хитой 15 сентябрдан эътиборан ўз фуқаролари учун мамлакатдан чиқиш, чет элликлар учун эса ҳудудга кириш тартибига янги талаблар жорий этади. Айрим ҳолатларда виза ёки тегишли рухсатнома олиш сезиларли даражада мураккаблашади.
31 июль куни қабул қилинган 19 моддадан иборат ушбу низом хавфсизликни таъминлаш, аризага қўйиладиган талабни аниқлаштириш ва маслаҳат ҳамда фирма хизматини тартибга солишга қаратилган.
Энди Чин фуқаролари хорижга чиқиш аризасида сафар мақсадини қонуний ва аниқ кўрсатиши шарт. Агар ёлғон маълумот ёки сохта ҳужжат тақдим этилса, иммиграция идораси чиқиш ҳужжатини беришни рад этади ёки умуман мамлакатни тарк этишни тақиқлайди. Хорижлик фуқаролар учун ҳам виза ва яшаш рухсатномаси олишда фақат ҳақиқий маълумот бериш талаб этилади. Нотўғри ахборот тақдим этган, чегара тартибини бузганлик учун жиноий жавобгарликка тортилган ёки сохта ҳужжат туфайли маъмурий жазо олган шахсларга Хитойга кириш тақиқланиши мумкин. Шунингдек, расмий идоралар томонидан чеклов қўйилган шахсларнинг мамлакатга кириши ҳам чекланади.
Бундан ташқари низом виза ва иммиграция хизмати кўрсатувчи агентликлар фаолиятини тартибга солади. Ҳужжат расмийлаштириш ёки консалтинг билан шуғулланувчи янги агентлик ташкил этилса, 15 кун ичида, амалдагилари эса янги қоида кучга киргандан сўнг 90 кун ичида маҳаллий иммиграция идорасида рўйхатдан ўтиши шарт.
Ф.Яхшибоева, ЎзА