Олий Мажлис Сенати раиси Танзила Норбоева бошчилигидаги Ўзбекистон парламенти делегацияси Сербия халқ йиғини таклифига биноан расмий ташриф билан Белград шаҳрида бўлиб турибди.

Ташриф доирасида делегация Парламентлараро иттифоқнинг Аёл парламентарийлар глобал конференциясида иштирок этди. Тадбирда 65 давлатдан 400 дан ортиқ делегат, парламент вакиллари, халқаро ташкилотлар ҳамда экспертлар қатнашди.

Конференцияни Парламентлараро иттифоқ президенти Тулия Эксон очиб бериб, аёллар ҳуқуқ ва манфаатларини ҳимоя қилиш масаласи бугун ҳам долзарб аҳамиятга эга эканини таъкидлади.

Анжуманнинг асосий мақсади гендер тенгликни таъминлаш, аёлларнинг сиёсий қарорлар қабул қилишдаги иштирокини кенгайтириш ҳамда парламентлар ўртасида тажриба алмашишни ривожлантиришдан иборат бўлди.

«Тенгликни тарғиб қилиш: гендер стереотиплари ва салбий ижтимоий нормаларни енгиб ўтиш» мавзусидаги сессияда сўзга чиққан Танзила Норбоева Ўзбекистонда гендер тенгликни таъминлаш йўналишида амалга оширилаётган ислоҳотлар ҳақида маълумот берди.

Анжуманда Ўзбекистонда гендер тенглик соҳасида амалга оширилаётган ислоҳотлар халқаро ҳамжамият томонидан эътироф этилаётгани таъкидланди. Хусусан, парламентдаги аёллар улуши 38 фоизга етгани, шунингдек, мамлакат Парламентлараро иттифоқ рейтингида 92 поғонага кўтарилиб, дунёда 36-ўринни эгаллагани қайд этилди.

Тадбир давомида парламентлар ўртасида гендер тенгликни таъминлашга қаратилган қонунчилик тажрибасини алмашиш ва самарали механизмларни жорий этиш бўйича қатор ташаббуслар илгари сурилди.

Шунингдек, иштирокчиларга 2026 йил 4–6 сентябр кунлари Самарқанд шаҳрида Парламентлараро иттифоқнинг Ёш парламент аъзолари глобал конференцияси ўтказилиши режалаштирилаётгани ҳақида маълумот берилди.

Kun.uz