Британия парламентининг иккала палатаси - Жамоалар палатаси ва Лордлар палатаси тамаки ва вейплар тўғрисидаги қонун лойиҳасининг якуний версиясини келишиб олди. Ҳужжат энди қирол Чарлз III розилигини кутмоқда, шундан сўнг у тўлиқ қонунга айланади.

Янги қонунга кўра, 2027 йил 1 январдан бошлаб Буюк Британияда 2009 йил 1 январда ёки ундан кейин туғилган барча фуқароларга тамаки маҳсулотларини (сигарета, сигара, ўрама тамаки ва бошқалар) сотиш умрбод тақиқланади.

Бу шуни англатадики, қонун кучга кирган пайтда 17 ёш ва ундан кичик бўлган одамлар ҳеч қачон мамлакатда тамакини қонуний равишда сотиб ололмайди. Ҳар йили ёш чегараси келажак авлодлар учун доимий бўлмагунча автоматик равишда бир йилга оширилади.

Қонун, шунингдек, электрон сигареталар ва вейпларни тартибга солишни сезиларли даражада кучайтиради:

- Ҳукуматнинг никотин маҳсулотларининг таъми, қадоқланиши ва рекламасини чеклаш бўйича ваколатлари кенгайтирилади;

- Чекиш тақиқланган аксарият жойларда, жумладан, мактаблар ва болалар майдончалари яқинидаги ҳудудларда вейпинг тақиқланади;

- Вояга етмаганларга вейпларни сотиш ва тарғиб қилиш бўйича қўшимча чекловлар жорий этилади.

Буюк Британия соғлиқни сақлаш вазири Уэс Стритинг бу воқеани «миллат саломатлиги учун тарихий лаҳза» деб атади.

Чекиш Буюк Британияда ўлимнинг олдини олиш мумкин бўлган асосий сабаб бўлиб қолмоқда, ҳар йили 80 мингга яқин одамнинг ҳаётига зомин бўлмоқда ва Миллий соғлиқни сақлаш хизматига (NHC) катта юклама бўлмоқда.

Ҳукумат янги қонун ёшлар орасида чекувчилар сонини кескин камайтиришига ва узоқ муддатли истиқболда мамлакатни тўлиқ «тутундан холи» бўлишга яқинлаштиришига умид қилмоқда.

Қирол розилигидан сўнг (сана ҳали белгиланмаган) қонун босқичма-босқич кучга киради. Тамаки савдосига қўйилган биринчи жиддий чекловлар 2027 йил январидан кучга киради.

Бу дунёдаги тамакига қарши энг кучли қонунлардан биридир. Аввалроқ шунга ўхшаш ташаббусни Янги Зеландияда амалга оширишга ҳаракат қилинди, бироқ кейинчалик ундан воз кечилди.

Kun.uz