ИСЛОМОБОД, 1 апрель. /"Дунё" АА/. Покистоннинг етакчи оммавий ахборот воситалари шу йил апрель ойида Тошкентда бўлиб ўтадиган Парламентлараро иттифоқнинг 150-юбилей ассамблеяси тафсилотлари кенг ёритмоқда, деб хабар қиляпти "Дунё" АА мухбири.

Хусусан, ушбу мамлакатнинг "Diplomatic News Agency – DNA" ва "Voice of Melange" ахборот агентлиги, "Pakistan in the World" ва "Diplomatic Insight" журналлари, "Islamabad Post", "Daily Ittehad", "Daily Spokesman" ва "The Asian Telegraph" газеталари, "The Gulf Observer", "The Europe Today" ва "World News" онлайн платформаларида Ўзбекистон Олий Мажлиси Қонунчилик палатаси депутати, академик Акмал Саидовнинг "Тошкент парламент дипломатияси маркази сифатида: Парламентлараро иттифоқнинг юбилей ассамблеяси" сарлавҳали мақола эълон қилинди.

Нашрлар 2025 йил апрель ойида Тошкент Марказий Осиё тарихида биринчи марта Парламентлараро иттифоқнинг 150-юбилей ассамблеясини қабул қилишини маълум қилган.

"Ушбу тадбир 100 дан ортиқ миллий парламентлардан 2000 дан ортиқ парламент аъзоларини бирлаштиради, бу эса асосий глобал масалаларни муҳокама қилиш учун ноёб имконият яратади. Тошкентнинг ушбу муҳим тадбир учун майдон сифатида танланиши Янги Ўзбекистоннинг халқаро парламент дипломатиясидаги таъсири ортиб бораётганини ва унинг демократик ислоҳотларга содиқлигини таъкидлайди", – дейилган материалларда.

Академик Акмал Саидов ёзганидек, Парламентлараро иттифоқнинг 150-юбилей ассамблеясининг Тошкентда ўтказилиши нафақат мамлакат учун тарихий воқеа, балки Марказий Осиёда парламент дипломатиясини ривожлантиришда янги босқичдир.

Ўзбекистоннинг Парламентлараро иттифоқ билан ҳамкорлиги амалий ва институтционал характерга эга: Олий Мажлис палаталари вакиллари Ижроия қўмитада, турли қўмиталарда фаол ишладилар, шунингдек, Парламентлараро Иттифоқнинг хотин-қизлар ва ёшлар форумларида иштирок этдилар.

"Парламентлараро иттифоқ бош котиби Мартин Чунгонг Ўзбекистондаги демократик ўзгаришларни юқори баҳолаб, уларнинг ҳокимият шаффофлигини таъминлаш ва парламент фаолияти самарадорлигини оширишдаги аҳамиятини таъкидлади. Шунингдек, парламентлараро иттифоқнинг 150-юбилей ассамблеяси пойтахти сифатида Тошкент шаҳрининг танланиши нафақат халқаро парламент ҳамжамиятининг ишончи, балки Ўзбекистонда парламентаризм соҳасида амалга оширилаётган кенг кўламли ислоҳотларнинг эътирофи ҳамдир", – дейилган нашрда.

Покистон ОАВ қайд этганидек, сўнгги йилларда Ўзбекистонда парламентнинг ролини кучайтириш, унинг ваколатларини кенгайтириш ва демократик механизмларни жорий этишда сезиларли ютуқларга эришилди.

Мақолаларда, шунингдек, "Парламентлараро иттифоқнинг 150-ассамблеяси "Ижтимоий тараққиёт ва адолат йўлидаги парламент ҳаракатлари" мавзуси доирасида бутун жаҳон ҳамжамияти учун долзарб бўлган кенг кўламли масалаларни қамраб олади", – деб ёзилган.