ISLOMOBOD, 1-aprel. /"Dunyo" AA/. Pokistonning yetakchi ommaviy axborot vositalari shu yil aprel oyida Toshkentda bo'lib o'tadigan Parlamentlararo ittifoqning 150-yubiley assambleyasi tafsilotlari keng yoritmoqda, deb xabar qilyapti "Dunyo" AA muxbiri.

Xususan, ushbu mamlakatning "Diplomatic News Agency – DNA" va "Voice of Melange" axborot agentligi, "Pakistan in the World" va "Diplomatic Insight" jurnallari, "Islamabad Post", "Daily Ittehad", "Daily Spokesman" va "The Asian Telegraph" gazetalari, "The Gulf Observer", "The Europe Today" va "World News" onlayn platformalarida O'zbekiston Oliy Majlisi Qonunchilik palatasi deputati, akademik Akmal Saidovning "Toshkent parlament diplomatiyasi markazi sifatida: Parlamentlararo ittifoqning yubiley assambleyasi" sarlavhali maqola e'lon qilindi.

Nashrlar 2025-yil aprel oyida Toshkent Markaziy Osiyo tarixida birinchi marta Parlamentlararo ittifoqning 150-yubiley assambleyasini qabul qilishini ma'lum qilgan.

"Ushbu tadbir 100 dan ortiq milliy parlamentlardan 2000 dan ortiq parlament a'zolarini birlashtiradi, bu esa asosiy global masalalarni muhokama qilish uchun noyob imkoniyat yaratadi. Toshkentning ushbu muhim tadbir uchun maydon sifatida tanlanishi Yangi O'zbekistonning xalqaro parlament diplomatiyasidagi ta'siri ortib borayotganini va uning demokratik islohotlarga sodiqligini ta'kidlaydi", – deyilgan materiallarda.

Akademik Akmal Saidov yozganidek, Parlamentlararo ittifoqning 150-yubiley assambleyasining Toshkentda o'tkazilishi nafaqat mamlakat uchun tarixiy voqea, balki Markaziy Osiyoda parlament diplomatiyasini rivojlantirishda yangi bosqichdir.

O'zbekistonning Parlamentlararo ittifoq bilan hamkorligi amaliy va institutsional xarakterga ega: Oliy Majlis palatalari vakillari Ijroiya qo'mitada, turli qo'mitalarda faol ishladilar, shuningdek, Parlamentlararo Ittifoqning xotin-qizlar va yoshlar forumlarida ishtirok etdilar.

"Parlamentlararo ittifoq bosh kotibi Martin Chungong O'zbekistondagi demokratik o'zgarishlarni yuqori baholab, ularning hokimiyat shaffofligini ta'minlash va parlament faoliyati samaradorligini oshirishdagi ahamiyatini ta'kidladi. Shuningdek, parlamentlararo ittifoqning 150-yubiley assambleyasi poytaxti sifatida Toshkent shahrining tanlanishi nafaqat xalqaro parlament hamjamiyatining ishonchi, balki O'zbekistonda parlamentarizm sohasida amalga oshirilayotgan keng ko'lamli islohotlarning e'tirofi hamdir", – deyilgan nashrda.

Pokiston OAV qayd etganidek, so'nggi yillarda O'zbekistonda parlamentning rolini kuchaytirish, uning vakolatlarini kengaytirish va demokratik mexanizmlarni joriy etishda sezilarli yutuqlarga erishildi.

Maqolalarda, shuningdek, "Parlamentlararo ittifoqning 150-assambleyasi "Ijtimoiy taraqqiyot va adolat yo'lidagi parlament harakatlari" mavzusi doirasida butun jahon hamjamiyati uchun dolzarb bo'lgan keng ko'lamli masalalarni qamrab oladi", – deb yozilgan.