15 октябрда Фарғона шаҳрида Марказий Осиё давлатлари ўртасида мулоқот, ишонч ва ҳамкорликнинг янги минтақавий майдонига айланиши кутилаётган Биринчи Фарғона тинчлик форумининг очилиши бўлиб ўтди. 

Форум Ўзбекистон Республикаси Президенти ҳузуридаги Стратегик ва минтақалараро тадқиқотлар институти, БМТнинг Марказий Осиё учун превентив дипломатия бўйича минтақавий маркази, ЕХҲТ, Европа Иттифоқи, шунингдек, қатор халқаро ва миллий ҳамкорлар томонидан ташкил этилди.

Анжуманда МДҲ, Осиё, Европа ва Америка мамлакатларининг етакчи "ақл марказлари" экспертлари, шунингдек, Марказий Осиё давлатларининг фуқаролик жамияти, бизнес, академик доиралари вакиллари ва ёшлар фаоллари иштирок этмоқда.

Сўзга чиққанлар қайд этганларидек, асрлар давомида водий савдо йўллари, маданият ва динлар кесишган цивилизациялар чорраҳаси бўлиб хизмат қилган. Аммо ХХ аср ва XXI асрнинг бошланиши ёпиқ чегаралар, бўлинган жамоалар, қўшнилар ўртасидаги ишончсизлик каби жиддий синовларни олиб келди.

Бугун минтақа давлатлари раҳбарларининг сиёсий иродаси туфайли тарихнинг бу саҳифаси ўзгармоқда. Давлатлараро чегаралар аста-секин ҳамкорлик кўприкларига, Фарғона водийсининг ўзи эса Марказий Осиёнинг янги даври рамзига айланиб бормоқда.

Ўзбекистон Республикаси Президенти ҳузуридаги Стратегик ва минтақалараро тадқиқотлар институти директори Элдор Арипов форум шунчаки муҳокама майдони эмас, балки минтақавий ҳамкорликнинг янги фалсафасини шакллантириш йўлидаги қадам эканини таъкидлади. Президент Шавкат Мирзиёевнинг БМТ Бош Ассамблеясининг юбилей 80-сессиясида "Марказий Осиёда ёпиқ чегаралар, ҳал этилмаган низо ва можаролар даври ўтмишда қолди. Бугун Янги Марказий Осиёни шакллантириш жараёни бошланди", дея қайд этган сўзларини ёдга олди.

– Фарғона водийси бир неча ўн йиллар давомида мураккаб зиддиятлар ҳудуди сифатида қабул қилинган. Бугун эса у яхши қўшничилик, очиқлик ва биргаликда бунёдкорлик орқали ишончсизликнинг тарихий меросини қандай енгиб ўтиш мумкинлиги бўйича намунага айланмоқда. Форум – бу жараённи мустаҳкамлаш, уни ўзаро тушуниш ва барқарор ривожланишнинг узоқ муддатли стратегиясига айлантиришга қилинган уринишдир, – деди Э. Арипов. Форум янги анъананинг – тажриба алмашиш, қўшма ташаббусларни ишлаб чиқиш ва минтақавий бирдамлик ғояларини илгари суришга қаратилган уч мамлакат вакилларининг йиллик учрашувларининг бошланиши бўлади. Ишончимиз комилки, фақат биргаликда чегаралар бўлиниш чизиғи эмас, балки боғланиш чизиғига айланадиган келажакни қуриш мумкин.

Форумда Инсон ҳуқуқлари бўйича Ўзбекистон Республикаси Миллий маркази директори академик Акмал Саидов ҳам иштирок этмоқда. А. Саидов Форумнинг иккинчи куни – 16 октябрда қирғизистонлик ҳамкорлар ва Тинчликни барпо этиш хаби кўмагида илк бор ташкил этиладиган "Интимак куни" (Бирдамлик куни) очилишида сўзга чиқиши режалаштирилган.

Инсон ҳуқуқлари бўйича

Ўзбекистон Республикаси

Миллий марказининг

матбуот хизмати