27 ноябрь куни Тошкент вилояти Бўстонлиқ туманидаги 54–сонли умумтаълим мактабида Ўзбекистон Республикаси Конституцияси қабул қилинганининг 33 йиллиги ҳамда 10 декабрь — Инсон ҳуқуқлари умумжаҳон декларацияси қабул қилинган кун муносабати билан учрашув бўлиб ўтди. Инсон ҳуқуқлари бўйича Ўзбекистон Республикаси Миллий маркази ушбу мактаб маъмурияти билан ҳамкорликда ташкил қилган ҳуқуқий-маърифий тадбирда ўқитувчи-педагоглар жамоаси ва 40 дан ортиқ ўқувчи иштирок этди.

Мулоқот аввалида сўзга чиққан Инсон ҳуқуқлари бўйича Ўзбекистон Республикаси Миллий маркази масъул ходими Ш.Амиров янги таҳрирдаги Конституциямизнинг референдумда халқ томонидан тўғридан-тўғри қабул қилинганлиги ушбу ҳужжатнинг олий юридик кучи ва мақомини янада мустаҳкамлаганига эътиборни қаратди. Шунингдек, Конституцияда фуқароларнинг ҳуқуқ ва бурчлари, ёшлар ва болалар ҳуқуқларига оид муҳим нормалар мустаҳкамлаб қўйилгани юзасидан атрофлича маълумот берилди.

Тадбирда Бирлашган Миллатлар Ташкилоти Бош Ассамблеяси 1948 йил 10 декабрда Инсон ҳуқуқлари умумжаҳон декларациясини қабул қилганлиги ва шу муносабат билан ҳар йили айни сана бутун дунёда Халқаро инсон ҳуқуқлари куни сифатида нишонланиши ҳақида ҳам фикр юритилди. Декларациянинг мазмун-моҳияти ва аҳамияти ҳамда Ўзбекистон миллий қонунчилигининг шаклланишига таъсири масалалари атрофлича талқин этилди.

Шундан сўнг иштирокчилар эътиборига Инсон ҳуқуқлари бўйича Ўзбекистон Республикаси Миллий маркази фаолиятига бағишланган видео-ролик ҳавола этилди. Ўқувчилар ва педагоглар Миллий марказнинг инсон ҳуқуқларини таъминлаш соҳасидаги ўрни, халқаро ва миллий даражаларда ўтказган йирик тадбирлари тўғрисидаги ахборотни катта қизиқиш билан эшитдилар.

Тадбир очиқ мулоқот ва ўзаро эркин фикр алмашув руҳида, ўқувчи-ёшларнинг фаол иштирокида ўтди. Ёшлар мавзуга доир саволларига батафсил жавоб олдилар.

Жонли мулоқотда фаол иштирок этган ўқувчилар эсдалик совғалари билан тақдирланди.

Учрашув якунида Инсон ҳуқуқлари  бўйича Ўзбекистон Республикаси Миллий маркази томонидан нашр этилган 20 дан ортиқ адабиёт мактаб кутубхонасига туҳфа этилди.

Инсон ҳуқуқлари бўйича

Ўзбекистон Республикаси

Миллий марказининг

матбуот хизмати