27-noyabr kuni Toshkent viloyati Bo‘stonliq tumanidagi 54–sonli umumta’lim maktabida O‘zbekiston Respublikasi Konstitutsiyasi qabul qilinganining 33-yilligi hamda 10-dekabr — Inson huquqlari umumjahon deklaratsiyasi qabul qilingan kun munosabati bilan uchrashuv bo‘lib o‘tdi. Inson huquqlari bo‘yicha O‘zbekiston Respublikasi Milliy markazi ushbu maktab ma’muriyati bilan hamkorlikda tashkil qilgan huquqiy-ma’rifiy tadbirda o‘qituvchi-pedagoglar jamoasi va 40 dan ortiq o‘quvchi ishtirok etdi.

Muloqot avvalida so‘zga chiqqan Inson huquqlari bo‘yicha O‘zbekiston Respublikasi Milliy markazi mas’ul xodimi Sh.Amirov yangi tahrirdagi Konstitutsiyamizning referendumda xalq tomonidan to‘g‘ridan to‘g‘ri qabul qilinganligi ushbu hujjatning oliy yuridik kuchi va maqomini yanada mustahkamlaganiga e’tiborni qaratdi. Shuningdek, Konstitutsiyada fuqarolarning huquq va burchlari, yoshlar va bolalar huquqlariga oid muhim normalar mustahkamlab qo‘yilgani yuzasidan atroflicha ma’lumot berildi.

Tadbirda Birlashgan Millatlar Tashkiloti Bosh Assambleyasi 1948-yil 10-dekabrda Inson huquqlari umumjahon deklaratsiyasini qabul qilganligi va shu munosabat bilan har yili ayni sana butun dunyoda Xalqaro inson huquqlari kuni sifatida nishonlanishi haqida ham fikr yuritildi. Deklaratsiyaning mazmun-mohiyati va ahamiyati hamda O‘zbekiston milliy qonunchiligining shakllanishiga ta’siri masalalari atroflicha talqin etildi.

Shundan so‘ng ishtirokchilar e’tiboriga Inson huquqlari bo‘yicha O‘zbekiston Respublikasi Milliy markazi faoliyatiga bag‘ishlangan video-rolik havola etildi. O‘quvchilar va pedagoglar Milliy markazning inson huquqlarini ta’minlash sohasidagi o‘rni, xalqaro va milliy darajalarda o‘tkazgan yirik tadbirlari to‘g‘risidagi axborotni katta qiziqish bilan eshitdilar.

Tadbir ochiq muloqot va o‘zaro erkin fikr almashuv ruhida, o‘quvchi-yoshlarning faol ishtirokida o‘tdi. Yoshlar mavzuga doir savollariga batafsil javob oldilar.

Jonli muloqotda faol ishtirok etgan o‘quvchilar esdalik sovg‘alari bilan taqdirlandi.

Uchrashuv yakunida Inson huquqlari  bo‘yicha O‘zbekiston Respublikasi Milliy markazi tomonidan nashr etilgan 20 dan ortiq adabiyot maktab kutubxonasiga tuhfa etildi.

Inson huquqlari bo‘yicha

O‘zbekiston Respublikasi

Milliy markazining

matbuot xizmati