Шу кунларда мамлакатимизда Ўзбекистон Республикаси Конституциясининг 33 йиллиги ҳамда 10 декабрь — Инсон ҳуқуқлари умумжаҳон декларацияси қабул қилинган кун кенг нишонланмоқда. Ҳар икки расмий ҳужжатда инсоннинг асосий ҳуқуқ ва эркинликлари қаторида таълим олиш ҳуқуқи кафолатлаб қўйилган.    

27 ноябрь куни Тошкент вилояти Бўстонлиқ туманидаги 2-умумий ўрта таълим мактабида бўлиб ўтган ҳуқуқий-маърифий мулоқотда шу ҳақда сўз борди. Тадбир Инсон ҳуқуқлари бўйича Ўзбекистон Республикаси Миллий маркази томонидан ташкил этилди.

Мулоқотда ушбу мактабнинг маънавий-маърифий ишлар бўйича директор ўринбосари М.Тўйчиева, тарих фани ўқитувчиси Ф.Юсупаҳметова билан бирга 9 ва 11-синф ўқувчилари иштирок этди.

Инсон ҳуқуқлари бўйича Ўзбекистон Республикаси Миллий маркази масъул ходимлари Н.Аслонов ва Н.Султоновнинг маърузалари тингланди.

Н.Аслонов Ўзбекистон Республикаси Конституцияси ва Инсон ҳуқуқлари умумжаҳон декларациясида мустаҳкамланган таълим олиш ҳуқуқининг моҳияти ҳамда аҳамияти тўғрисида сўз юритди. Ўз навбатида, Н.Султонов янги таҳрирда қабул қилинган Конституциямизга киритилган таълим соҳасига оид муҳим ўзгартириш ва қўшимчаларнинг маъно-мазмуни, шунингдек, Ўзбекистонда таълим соҳасини ривожлантириш йўлида  амалга оширилаётган тизимли ислоҳотлар самаралари ҳақида тўхталди.

  Шундан сўнг, Инсон ҳуқуқлари  бўйича Ўзбекистон Республикаси Миллий маркази фаолиятига бағишланган видео-ролик намойиш этилди.

Миллий марказ томонидан ҳуқуқий мавзуларда нашр этилган 20 дан зиёд китоб мактаб кутубхонасига беғараз топширилди.

Тадбир доирасида ўқувчилар учун юридик адабиётлар кўргазмаси ҳам ташкил этилди.

Учрашув мактаб жамоаси ва ўқувчилар учун катта илҳом манбаи бўлди. Тадбирда фаол қатнашган 9-синф ўқувчиси Б.Баҳромов ҳамда 11-синф ўқувчилари Ш.Абдуғаниева ва Н.Самандаровга Миллий марказ номидан эсдалик совғалари тақдим қилинди.

Инсон ҳуқуқлари бўйича

Ўзбекистон Республикаси

Миллий марказининг

матбуот хизмати