Shu kunlarda mamlakatimizda O‘zbekiston Respublikasi Konstitutsiyasining 33-yilligi hamda 10-dekabr — Inson huquqlari umumjahon deklaratsiyasi qabul qilingan kun keng nishonlanmoqda. Har ikki rasmiy hujjatda insonning asosiy huquq va erkinliklari qatorida ta’lim olish huquqi kafolatlab qo‘yilgan.    

27-noyabr kuni Toshkent viloyati Bo‘stonliq tumanidagi 2-umumiy o‘rta ta’lim maktabida bo‘lib o‘tgan huquqiy-ma’rifiy muloqotda shu haqda so‘z bordi. Tadbir Inson huquqlari bo‘yicha O‘zbekiston Respublikasi Milliy markazi tomonidan tashkil etildi.

Muloqotda ushbu maktabning ma’naviy-ma’rifiy ishlar bo‘yicha direktor o‘rinbosari M.To‘ychiyeva, tarix fani o‘qituvchisi F.Yusupahmetova bilan birga 9 va 11-sinf o‘quvchilari ishtirok etdi.

Inson huquqlari bo‘yicha O‘zbekiston Respublikasi Milliy markazi mas’ul xodimlari N.Aslonov va N.Sultonovning ma’ruzalari tinglandi.

N.Aslonov O‘zbekiston Respublikasi Konstitutsiyasi va Inson huquqlari umumjahon deklaratsiyasida mustahkamlangan ta’lim olish huquqining mohiyati hamda ahamiyati to‘g‘risida so‘z yuritdi. O‘z navbatida, N.Sultonov yangi tahrirda qabul qilingan Konstitutsiyamizga kiritilgan ta’lim sohasiga oid muhim o‘zgartirish va qo‘shimchalarning ma’no-mazmuni, shuningdek, O‘zbekistonda ta’lim sohasini rivojlantirish yo‘lida  amalga oshirilayotgan tizimli islohotlar samaralari haqida to‘xtaldi.

  Shundan so‘ng, Inson huquqlari  bo‘yicha O‘zbekiston Respublikasi Milliy markazi faoliyatiga bag‘ishlangan video-rolik namoyish etildi.

Milliy markaz tomonidan huquqiy mavzularda nashr etilgan 20 dan ziyod kitob maktab kutubxonasiga beg‘araz topshirildi.

Tadbir doirasida o‘quvchilar uchun yuridik adabiyotlar ko‘rgazmasi ham tashkil etildi.

Uchrashuv maktab jamoasi va o‘quvchilar uchun katta ilhom manbai bo‘ldi. Tadbirda faol qatnashgan 9-sinf o‘quvchisi B.Bahromov hamda 11-sinf o‘quvchilari Sh.Abdug‘aniyeva va N.Samandarovga Milliy markaz nomidan esdalik sovg‘alari taqdim qilindi.

Inson huquqlari bo‘yicha

O‘zbekiston Respublikasi

Milliy markazining

matbuot xizmati