27 ноябрь куни Инсон ҳуқуқлари бўйича Ўзбекистон Республикаси Миллий маркази томонидан Тошкент вилояти Бўстонлиқ тумани 3-умумий ўрта таълим мактабида ҳуқуқий-маърифий мулоқот ўтказилди. Тадбир Ўзбекистон Республикаси Конституцияси қабул қилинганининг 33 йиллиги ҳамда 10 декабрь – Халқаро инсон ҳуқуқлари куни муносабати билан ташкил этилди.

Мулоқотда Инсон ҳуқуқлари бўйича Ўзбекистон Республикаси Миллий маркази бўлим бошлиғи К. Олимова ва бош мутахассис  С. Бозоров, Тошкент вилояти мактабгача ва мактаб таълими бошқармаси мактабдан ташқари таълим бўлими масъул ходими Б. Қаландаров, мактаб директори Б. Нормурзаев, бир гуруҳ ўқитувчи-педагоглар ва 40 дан ортиқ мактаб ўқувчиси иштирок этди.  

Марказ масъул ходимлари  Инсон ҳуқуқлари умумжаҳон декларацияси ва янги таҳрирдаги Ўзбекистон Республикаси Конституциясида болалар ҳуқуқлари, гендер тенглик ва инклюзив таълимга оид нормаларнинг мазмун-моҳияти мавзусида маъруза қилдилар. Бунда болаларга нисбатан зўравонликнинг олдини олиш, инклюзив таълимни ривожлантириш, гендер тенгликни таъминлаш ҳамда хотин-қизларнинг таълим олиш ҳуқуқига оид миллий ва халқаро мезонлар батафсил очиб берилди.

Мамлакатимизда айни йўналишларда амалга оширилаётган ислоҳотлар нафақат болалар ва хотин-қизларнинг ҳуқуқларини таъминлаш, балки жамиятда тенг имкониятлар яратиш, ҳар бир шахснинг хавфсиз ва муносиб турмуш кечириши учун ҳуқуқий асосларни мустаҳкамлашда муҳим ўрин тутаётгани алоҳида қайд этилди.

Жонли мулоқотда фаол иштирок этган ўқувчилар эсдалик совғалари билан тақдирланди.

Тадбир якунида Инсон ҳуқуқлари бўйича Ўзбекистон Республикаси Миллий маркази номидан мактаб кутубхонаси фонди учун 20 дан зиёд ҳуқуқий ва бадиий адабиёт беғараз тақдим этилди.

Инсон ҳуқуқлари бўйича

Ўзбекистон Республикаси

Миллий марказининг

матбуот хизмати