27-noyabr kuni Inson huquqlari bo‘yicha O‘zbekiston Respublikasi Milliy markazi tomonidan Toshkent viloyati Bo‘stonliq tumani 3-umumiy o‘rta ta’lim maktabida huquqiy-ma’rifiy muloqot o‘tkazildi. Tadbir O‘zbekiston Respublikasi Konstitutsiyasi qabul qilinganining 33-yilligi hamda 10-dekabr – Xalqaro inson huquqlari kuni munosabati bilan tashkil etildi.

Muloqotda Inson huquqlari bo‘yicha O‘zbekiston Respublikasi Milliy markazi bo‘lim boshlig‘i K. Olimova va bosh mutaxassis  S. Bozorov, Toshkent viloyati maktabgacha va maktab ta’limi boshqarmasi maktabdan tashqari ta’lim bo‘limi mas’ul xodimi B. Qalandarov, maktab direktori B. Normurzayev, bir guruh o‘qituvchi-pedagoglar va 40 dan ortiq maktab o‘quvchisi ishtirok etdi.  

Markaz mas’ul xodimlari  Inson huquqlari umumjahon deklaratsiyasi va yangi tahrirdagi O‘zbekiston Respublikasi Konstitutsiyasida bolalar huquqlari, gender tenglik va inklyuziv ta’limga oid normalarning mazmun-mohiyati mavzusida ma’ruza qildilar. Bunda bolalarga nisbatan zo‘ravonlikning oldini olish, inklyuziv ta’limni rivojlantirish, gender tenglikni ta’minlash hamda xotin-qizlarning ta’lim olish huquqiga oid milliy va xalqaro mezonlar batafsil ochib berildi.

Mamlakatimizda ayni yo‘nalishlarda amalga oshirilayotgan islohotlar nafaqat bolalar va xotin-qizlarning huquqlarini ta’minlash, balki jamiyatda teng imkoniyatlar yaratish, har bir shaxsning xavfsiz va munosib turmush kechirishi uchun huquqiy asoslarni mustahkamlashda muhim o‘rin tutayotgani alohida qayd etildi.

Jonli muloqotda faol ishtirok etgan o‘quvchilar esdalik sovg‘alari bilan taqdirlandi.

Tadbir yakunida Inson huquqlari bo‘yicha O‘zbekiston Respublikasi Milliy markazi nomidan maktab kutubxonasi fondi uchun 20 dan ziyod huquqiy va badiiy adabiyot beg‘araz taqdim etildi.

Inson huquqlari bo‘yicha

O‘zbekiston Respublikasi

Milliy markazining

matbuot xizmati