Ўзбекистон Республикаси Ҳуқуқни муҳофаза қилиш академиясида “Замонавий чақириқлар шароитида қонун устуворлигини таъминлаш: муаммо ва ечимлар” мавзусида халқаро илмий-амалий конференция ташкил этилди.

Қонун устуворлигини мустаҳкамлаш, ҳуқуқни муҳофаза қилувчи органлар ходимларининг касбий компетенцияларини ривожлантириш, замонавий чақириқларга қарши курашиш ва халқаро ҳамкорликни кенгайтиришга қаратилган тўққизта йирик халқаро ўқув ва илмий-амалий тадбирдан иборат академик декаданинг якуний ва асосий тадбири бўлган конференция Ҳуқуқни муҳофаза қилиш академияси томонидан GIZ, ЕХҲТ, БМТнинг Гиёҳвандлик ва жиноятчилик бўйича бошқармаси (UNODC), ICITAP, МОМ ҳамда бошқа халқаро ҳамкор ташкилотлар билан ҳамкорликда гибрид форматда ташкил этилди. 

Унда 34 давлатдан 49 нафар эксперт, умумий ҳисобда эса 120 дан ортиқ хорижий ва халқаро мутахассислар қатнашди. Хусусан, АҚШ, Буюк Британия, Германия, Франция, Испания, Нидерландия, Туркия, Канада, Корея, Малайзия, Марокаш, Латвия, Қозоғистон, Қирғизистон, Тожикистон, Озарбайжон ва бошқа қатор давлатлар вакиллари, шунингдек, БМТ, ЕХҲТ, Европа Иттифоқи, Халқаро прокурорлар ассоциацияси, ЮНЕСКО, ЮНИСЕФ, МАСА, IACA ва Халқаро миграция ташкилоти каби нуфузли халқаро тузилмалар делегациялари тадбирда иштирок этди.

Бош прокурор ўринбосари С.Самадов, Олий суд раисининг биринчи ўринбосари А.Усмонов, академик А.Саидов ва бошқалар  ҳуқуқни муҳофаза қилиш соҳаси учун юқори малакали кадрлар тайёрлашда академиянинг ўзига хос ўрни борлигини алоҳида таъкидлади. 

Трансмиллий таҳдидларга қарши курашиш учун замонавий кадрлар тайёрлаш бугунги кунда долзарб аҳамият касб этмоқда. Шу боис, ҳуқуқни муҳофаза қилиш тизимини модернизация қилиш жараёнида фан ва таълим салоҳиятининг ўрни, замонавий технологиялар, жумладан, сунъий интеллектни жорий этишга эътибор қаратилаётганининг аҳамияти беқиёс. 

Европа Иттифоқи, БМТ, ЕХҲТ ва Халқаро прокурорлар ассоциацияси вакиллари трансмиллий жиноятчилик, коррупция ва терроризмга қарши курашиш, шунингдек инсон ҳуқуқларини ҳимоя қилиш соҳаларида глобал ҳамкорликни янада мустаҳкамлаш зарурлигини таъкидлаб ўтди.

Хорижий экспертлар муҳокамаларга сезиларли ҳисса қўшди. Қозоғистон ва Қирғизистон ҳуқуқни муҳофаза қилиш академиялари раҳбарлари кадрлар тайёрлаш соҳасида халқаро ҳамкорликни кенгайтириш ва тажриба алмашишнинг долзарб аҳамиятини қайд этди. 

Конференция дастури ялпи мажлис ва олтита параллел сессиядан иборат бўлиб, улар жиноий фаолиятдан олинган даромадларни легаллаштириш ва терроризмни молиялаштиришга қарши курашиш, ҳуқуқни муҳофаза қилиш соҳасида таълим ва фанни ривожлантириш, коррупцияга қарши курашиш, сунъий интеллектни ҳуқуқий жиҳатдан тартибга солиш, киберхавфсизликни таъминлаш ҳамда глобал миграция шароитида инсон ҳуқуқларини ҳимоя қилиш масалаларига бағишланди.

Алоҳида сессия мигрантлар ва одам савдоси жабрдийдалари ҳуқуқларини ҳимоя қилиш, шунингдек уларни реабилитация ва реинтеграция қилиш борасидаги минтақавий ва халқаро саъй-ҳаракатларга бағишланди.

– Конференция ҳуқуқни муҳофаза қилиш соҳасида илмий ва амалий мулоқотни ривожлантириш, илғор тажрибаларни ўрганиш ва инновацион ечимларни излаш учун муҳим халқаро платформа бўлиб хизмат қилди, – деди Болалар омбудсмани Сурайё Раҳмонова. –  Айтиб ўтиш керакки, ташкил этилганига уч йил бўлган мазкур академия қонун устуворлигини таъминлаш ва ҳуқуқ-тартиботни мустаҳкамлаш бўйича Марказий Осиёдаги етакчи олий ўқув даргоҳи ҳисобланади. Ўзбекистон минтақада ҳуқуқни муҳофаза қилиш тизимида янги рогрессив ёндашувларни жорий қилишда ҳам илғор ҳисобланади. Буни бугунги анжуманда халқаро мутахассислар ҳам эътироф этди. Анжуманда болалар ҳуқуқлари билан боғлиқ муаммоли масалаларга илмий ёндашув, халқаро даражада уларга ечим топиш бўйича ҳам фикр алмашилди.   

Конференция доирасида Ҳуқуқни муҳофаза қилиш академияси томонидан Ички ишлар вазирлигининг Асосий эксперт-криминалистика маркази, киберхавфсизлик соҳасида етакчи халқаро компания Group-IB, Олий Мажлис Қонунчилик палатаси ҳузуридаги Ёшлар парламенти билан ҳамкорлик тўғрисидаги меморандумлар имзоланди. Шунингдек, хорижий делегациялар билан бир қатор икки томонлама учрашувлар ўтказилиб, келгусидаги ҳамкорликнинг истиқболли йўналишлари белгиланди. Халқаро ҳамкорликни кенгайтиришга қаратилган қатор амалий тавсиялар ишлаб чиқилди.

Тадбир материаллари ва якунлари махсус тўплам шаклида чоп этилиши режалаштирилган.

Норгул Абдураимова, Ўктам Ҳайитов (сурат), ЎзА