O‘zbekiston Respublikasi Huquqni muhofaza qilish akademiyasida “Zamonaviy chaqiriqlar sharoitida qonun ustuvorligini ta’minlash: muammo va yechimlar” mavzusida xalqaro ilmiy-amaliy konferensiya tashkil etildi.

Qonun ustuvorligini mustahkamlash, huquqni muhofaza qiluvchi organlar xodimlarining kasbiy kompetensiyalarini rivojlantirish, zamonaviy chaqiriqlarga qarshi kurashish va xalqaro hamkorlikni kengaytirishga qaratilgan to‘qqizta yirik xalqaro o‘quv va ilmiy-amaliy tadbirdan iborat akademik dekadaning yakuniy va asosiy tadbiri bo‘lgan konferensiya Huquqni muhofaza qilish akademiyasi tomonidan GIZ, YeXHT, BMTning Giyohvandlik va jinoyatchilik bo‘yicha boshqarmasi (UNODC), ICITAP, MOM hamda boshqa xalqaro hamkor tashkilotlar bilan hamkorlikda gibrid formatda tashkil etildi. 

Unda 34 davlatdan 49 nafar ekspert, umumiy hisobda esa 120 dan ortiq xorijiy va xalqaro mutaxassislar qatnashdi. Xususan, AQSH, Buyuk Britaniya, Germaniya, Fransiya, Ispaniya, Niderlandiya, Turkiya, Kanada, Koreya, Malayziya, Marokash, Latviya, Qozog‘iston, Qirg‘iziston, Tojikiston, Ozarbayjon va boshqa qator davlatlar vakillari, shuningdek, BMT, YeXHT, Yevropa Ittifoqi, Xalqaro prokurorlar assotsiatsiyasi, YUNESKO, YUNISEF, MASA, IACA va Xalqaro migratsiya tashkiloti kabi nufuzli xalqaro tuzilmalar delegatsiyalari tadbirda ishtirok etdi.

Bosh prokuror o‘rinbosari S.Samadov, Oliy sud raisining birinchi o‘rinbosari A.Usmonov, akademik A.Saidov va boshqalar  huquqni muhofaza qilish sohasi uchun yuqori malakali kadrlar tayyorlashda akademiyaning o‘ziga xos o‘rni borligini alohida ta’kidladi. 

Transmilliy tahdidlarga qarshi kurashish uchun zamonaviy kadrlar tayyorlash bugungi kunda dolzarb ahamiyat kasb etmoqda. Shu bois, huquqni muhofaza qilish tizimini modernizatsiya qilish jarayonida fan va ta’lim salohiyatining o‘rni, zamonaviy texnologiyalar, jumladan, sun’iy intellektni joriy etishga e’tibor qaratilayotganining ahamiyati beqiyos. 

Yevropa Ittifoqi, BMT, YeXHT va Xalqaro prokurorlar assotsiatsiyasi vakillari transmilliy jinoyatchilik, korrupsiya va terrorizmga qarshi kurashish, shuningdek inson huquqlarini himoya qilish sohalarida global hamkorlikni yanada mustahkamlash zarurligini ta’kidlab o‘tdi.

Xorijiy ekspertlar muhokamalarga sezilarli hissa qo‘shdi. Qozog‘iston va Qirg‘iziston huquqni muhofaza qilish akademiyalari rahbarlari kadrlar tayyorlash sohasida xalqaro hamkorlikni kengaytirish va tajriba almashishning dolzarb ahamiyatini qayd etdi. 

Konferensiya dasturi yalpi majlis va oltita parallel sessiyadan iborat bo‘lib, ular jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish, huquqni muhofaza qilish sohasida ta’lim va fanni rivojlantirish, korrupsiyaga qarshi kurashish, sun’iy intellektni huquqiy jihatdan tartibga solish, kiberxavfsizlikni ta’minlash hamda global migratsiya sharoitida inson huquqlarini himoya qilish masalalariga bag‘ishlandi.

Alohida sessiya migrantlar va odam savdosi jabrdiydalari huquqlarini himoya qilish, shuningdek ularni reabilitatsiya va reintegratsiya qilish borasidagi mintaqaviy va xalqaro sa’y-harakatlarga bag‘ishlandi.

– Konferensiya huquqni muhofaza qilish sohasida ilmiy va amaliy muloqotni rivojlantirish, ilg‘or tajribalarni o‘rganish va innovatsion yechimlarni izlash uchun muhim xalqaro platforma bo‘lib xizmat qildi, – dedi Bolalar ombudsmani Surayyo Rahmonova. –  Aytib o‘tish kerakki, tashkil etilganiga uch yil bo‘lgan mazkur akademiya qonun ustuvorligini ta’minlash va huquq-tartibotni mustahkamlash bo‘yicha Markaziy Osiyodagi yetakchi oliy o‘quv dargohi hisoblanadi. O‘zbekiston mintaqada huquqni muhofaza qilish tizimida yangi rogressiv yondashuvlarni joriy qilishda ham ilg‘or hisoblanadi. Buni bugungi anjumanda xalqaro mutaxassislar ham e’tirof etdi. Anjumanda bolalar huquqlari bilan bog‘liq muammoli masalalarga ilmiy yondashuv, xalqaro darajada ularga yechim topish bo‘yicha ham fikr almashildi.   

Konferensiya doirasida Huquqni muhofaza qilish akademiyasi tomonidan Ichki ishlar vazirligining Asosiy ekspert-kriminalistika markazi, kiberxavfsizlik sohasida yetakchi xalqaro kompaniya Group-IB, Oliy Majlis Qonunchilik palatasi huzuridagi Yoshlar parlamenti bilan hamkorlik to‘g‘risidagi memorandumlar imzolandi. Shuningdek, xorijiy delegatsiyalar bilan bir qator ikki tomonlama uchrashuvlar o‘tkazilib, kelgusidagi hamkorlikning istiqbolli yo‘nalishlari belgilandi. Xalqaro hamkorlikni kengaytirishga qaratilgan qator amaliy tavsiyalar ishlab chiqildi.

Tadbir materiallari va yakunlari maxsus to‘plam shaklida chop etilishi rejalashtirilgan.

Norgul Abduraimova, O‘ktam Hayitov (surat), O‘zA