Бирлашган Миллатлар Ташкилоти (БМТ) Бош ассамблеясининг 2003 йил 21 ноябрдаги резолюциясига мувофиқ, 2004 йилдан бошлаб 9 декабрь – Халқаро коррупцияга қарши кураш куни сифатида нишонланади.

Мазкур санада Мерида (Мексика) шаҳрида БМТ ташаббуси билан Коррупцияга қарши кураш бўйича халқаро конвенция имзоланган.

Бош ассамблея резолюциясига кўра, бу кунни белгилашдан мақсад коррупция муаммосининг туб моҳиятини тушуниб етиш ва коррупция билан курашиш ҳамда уни олдини олишдан иборат.

Ўзбекистонда Президент Шавкат Мирзиёевнинг сиёсий иродаси билан мамлакатда коррупцияга қарши курашиш бўйича  янги миллий модел яратилмоқда. 

Бу борадаги ислоҳотлар ҳақида сўз юритилганда, 2025 йилда давлат раҳбари иштирокида Коррупцияга қарши курашиш миллий  кенгашининг йиғилиши ўтказилганини алоҳида қайд этиш жоиз. 

Ҳудудларда коррупциянинг олдини олиш бўйича барча соҳа ва  тармоқларни қамраб олувчи “Йўл хариталари” тасдиқланди. Давлат органлари ва ташкилотларида 11 минг 487 манфаатлар тўқнашуви ҳолатлари аниқланиб, бартараф этилди.

Манфаатлар тўқнашуви бўйича 85 минг нафардан ортиқ давлат  хизматчилари ўқитилди. Ҳуқуқий эксперимент сифатида Соғлиқни сақлаш, Қурилиш ва уй-жой коммунал хўжалиги, Сув хўжалиги вазирликлари ҳамда «Ўзбекнефтгаз» ва «Ўзсувтаъминот» акциядорлик жамиятларнинг ички назорат тузилмалари Коррупцияга қарши курашиш агентлигига ўтказилди.

Коррупцияга қарши курашиш муаммолари бўйича Минтақавий тадқиқот маркази ташкил этилди. Нодавлат нотижорат ташкилотлари учун коррупцияга қарши курашиш мавзуларида 3 миллиард 761 миллион сўмлик грантлар эълон қилинди.

1 июлга қадар 800 нафарга яқин раҳбар коррупцияга қарши барқарорлик даражаси бўйича тестдан ўтказилди. Давлат органларида очиқлик даражасини баҳолашга қаратилган Очиқлик индекси ва Коррупцияга қарши курашиш ишларининг самарадорлиги бўйича рейтинг натижалари эълон қилинди.

БМТнинг Коррупцияга қарши конвенцияси иштирокчи-давлатлари конференциясининг 11-йиғилишида Ўзбекистон  Марказий Осиёда коррупцияга қарши сиёсатда ташаббускор давлат  сифатида эътироф этилади.

Очиқлик бўйича Open Data рейтингида Ўзбекистон 138 поғонага кўтарилиб, Марказий Осиёда биринчи жаҳонда 11-ўринни эгаллади.

БМТ Тараққиёт дастури билан ҳамкорликда Европа стандартларига асосланган  “Ҳалол ҳокимият” лойиҳаси учта туман ва шаҳарда синов тарзида жорий этилди. Ўзбекистон расман Осиё ва Тинч океани давлатлари учун коррупцияга қарши курашиш ташаббуси аъзолигига қабул қилинди. Ўзбекистон Коррупцияга қарши курашиш бўйича давлатлараро кенгаш тузиш тўғрисидаги битимга қўшилди.

БМТ томонидан БМТнинг Коррупцияга қарши конвенцияси иккинчи босқич обзори доирасида Ўзбекистоннинг коррупцияга қарши курашиш сиёсати ўрганилди.

Н.Абдураимова, ЎзА