ЮНИСЕФ маълум қилишича, 2023 йилда бутун дунё бўйлаб 5 ёшгача бўлган 4,8 миллион бола вафот этган. Энг оғир аҳвол Африкада кузатилган: бу ерда 2,76 миллион бола 5 ёшга етолмаган.

БМТнинг болалар ўлими кўрсаткичларини баҳолаш бўйича Идоралараро гуруҳи маълумотларига кўра, болалар ўлими улуши бўйича етакчи мамлакат — Нигер. У ерда болаларнинг 11,5 фоизи 5 ёшга етмай вафот этган. Нигерия, Чад ва Сомалида ҳам вазият ўта кескин: бу мамлакатларда ҳар ўнинчи бола 5 ёшга етмай ҳалок бўлади.

Шимолий Африкада эса вазият унчалик кескин эмас. Тунисда болалар ўлими кўрсаткичи 1,3 фоиз, Марокашда — 1,7 фоиз, Мисрда — 1,8 фоизни ташкил этган.

Бу маълумотлар Колумбия (1,2 фоиз) ва Мексика (1,2 фоиз) кўрсаткичларига яқин. Европада эса энг юқори болалар ўлими Молдовада қайд этилган — тахминан 1,5 фоиз.

Kun.uz