"Yoshlar huquqlari bo'yicha yagona xalqaro konventsiya qabul qilinishi bugun har qachongidan ham zarur va muhim ahamiyat kasb etmoqda". Bu e'tirof "Yoshlar 2020: global hamjihatlik, barqaror taraqqiyot va inson huquqlari” mavzusida bo'lib o'tayotgan Samarqand veb-forumida yangradi.

Inson huquqlari bo'yicha ikki kunlik (joriy yil 12-13 avgust) forumda navqiron insonlarning demokratik jarayonlarda faol ishtirok etishi zarurligi haqida atroflicha fikrlar bildirilmoqda. Boshqa bir qator huquqlar kabi ushbu qoida ham forum davomida nufuzli ekspertlar hamjamiyati muhokama qilayotgan Yoshlar huquqlari to'g'risidagi xalqaro konventsiyaning loyihasi matnida mustahkamlangan.

"Katta avlod vakillari yoshlarni jamiyat hayotining barcha sohalariga, umuman, jamiyatga keng jalb etishlari kerak", deb hisoblaydi Yevropada Xavfsizlik va hamkorlik tashkiloti Parlament Assambleyasi prezidenti Georgiy Sereteli.

U Inson huquqlari bo'yicha Samarqand veb-forumining 12 avgustda bo'lib o'tgan ochilish marosimidagi chiqishida ta'kidlaganidek, "Aksariyat milliy parlamentlarda yoshlar yetarlicha vakillariga ega emas va bu holatning oqibati YEXHT Parlament Assambleyasi tarkibida ham o'z aksini topgan".

"Buni tan olgan holda, bizning Assambleya yoshlar siyosiy muloqotini rivojlantirish maqsadida mavjud salohiyatlarni oshirish va ilg'or tajriba almashish yo'li bilan xalqaro hamkorlikni kengaytirishga e'tiborni kuchaytirmoqda. Joriy yilning boshida biz YEXHT Parlament Assambleyasining barcha vosita va resurslarini taqdim etish bilan shug'ullanadigan yosh parlament a'zolari tarmog'ini tuzdik va maqsadimiz ana shu navqiron yetakchilarga o'z salohiyatini to'la namoyon etishlariga ko'maklashishdir", dedi G.Sereteli.

Shuningdek, u yoshlar huquqlariga bag'ishlangan Samarqand forumi tashkilotchilari ushbu loyihani pandemiya davrida hayotga tatbiq eta olganlari juda muhim ekanini alohida e'tirof etdi.

Samarqand forumini "COVID-19 pandemiyasi oqibatida butun dunyodagi shaharlar va insonlarning sog'lig'i va iqtisodiyoti jiddiy xatarga duchor bo'lib turgan shunday murakkab davrda" tashkil etish va o'tkazishga muvaffaq bo'linganini Osiyo Parlament Assambleyasi Bosh kotibi Muhammad Rizo Majidiy ham o'z murojaatida yuqori baholadi.

"Bugungi anjumanimiz kun tartibidagi asosiy masala inson huquqlari, xususan, yoshlar huquqlariga alohida bag'ishlangan", dedi Osiyo Parlament Assambleyasi Bosh kotibi. Uning fikricha,  bunda "15 yoshdan - 25 yoshgacha bo'lgan navqiron insonlar yer yuzi aholisining qariyb 50 foizini tashkil qilishi" atta ahamiyat kasb etadi.

"Yoshlar - har qanday demokratiyaning kelajagidir. Bugungi yoshlar - ertangi kunning yetakchilari va shu muhim omilning o'zi ham umumbashariy muammolarni hal etish yo'lida yangi g'oyalar tug'ilishi uchun asos bo'lishi mumkin", deb hisoblaydi Muhammad Rizo Majidiy. Shu munosabat bilan u BMT Bosh Assambleyasining 72-sessiyasida "Yoshlar huquqlari to'g'risidagi xalqaro konventsiyani ishlab chiqish va qabul qilish"ga doir tashabbusni ilgari surgani uchun O'zbekiston Prezidentiga minnatdorchilik bildirdi.

Osiyo Parlament Assambleyasi rahbarining fikricha, "hech shubhasiz, bu uzoq kutilgan tashabbus bo'lib, Yoshlar huquqlari bo'yicha yagona xalqaro konventsiya qabul qilinishi bugun har qachongidan ham zarur va muhim ahamiyat kasb etmoqda".

"Konventsiya muqaddimasida qayd etilganidek, barcha mamlakatlarda yoshlar rivojlanish maqsadlari uchun zarur bo'lgan asosiy odam resurslaridan biri ekanligi va ijtimoiy o'zgarishlar, iqtisodiy rivojlanish hamda texnika taraqqiyotining asosiy ishtirokchilari hisoblanishi tan olingan. Haqiqatan ham, tom ma'nodagi inklyuziv jamiyat yoshlarning ijtimoiy, iqtisodiy va siyosiy taraqqiyot jarayonlarida ishtirok etishlari uchun zarur sharoitlarni yaratishi lozim. Aks holda, raqamlashtirish davrining salbiy ta'siri yuzaga chiqadi, xususan, zamonaviy texnologiyalarning jadal rivojlanishi tufayli hayot tarzi, ish o'rinlari, ta'lim, istak va imkoniyatlar tezkor o'zgarishlarga yuz tutadi, shu bilan birga, yoshlar orasida global ishsizlik ortib boradi", deydi Osiyo Parlament Assambleyasi rahbari.

Uning qayd etishicha, "yoshlarning shiddat-shijoatini muayyan faoliyatga yo'naltirish g'oyatda muhim bo'lib, bu sezilarli foyda keltirishi va 2030 yilgacha bo'lgan davrga mo'ljallangan Barqaror rivojlanish maqsadlariga erishish va boshqa strategiyalarni amalga oshirishda qo'l kelishi mumkin. Kelgusi muvaffaqiyatlar navqiron avlodning milliy, mintaqaviy va global darajalarda qanchalik jalb
etilishiga bog'liqdir".

O'zbekiston Respublikasining inson huquqlari sohasida naqadar faol ish olib borayotganiga Samarqand forumi yaqqol misol bo'la oladi, deb ta'kidladi MDH Ijroiya qo'mitasi raisi – Ijrochi kotibi Sergey Lebedev.

"Barchamiz yaxshi bilamizki, yoshlar - bizning kelajagimiz. Ammo, ular faqat kelajagimizgina emas. Biz navqiron insonlarning tinchlik va xavfsizlikni ta'minlash, iqtisodiy va ijtimoiy rivojlanish, insonparvarlik faoliyati sohalaridagi muhim hamda ijobiy hissalarini munosib darajada e'tirof etamiz", deb qayd etdi S.Lebedev.

Qizg'in munozaralar ruhida o'tayotgan Samarqand forumining asosiy milliy tashkilotchisi O'zbekiston Hukumati hisoblanadi. Xalqaro anjumanni o'tkazish mas'uliyati Inson huquqlari bo'yicha O'zbekiston Respublikasi Milliy markazi, shuningdek O'zbekiston Respublikasi Tashqi ishlar vazirligiga yuklangan.

Forum BMTning Inson huquqlari bo'yicha oliy komissari Boshqarmasi hamda ushbu Boshqarmaning Markaziy Osiyo bo'yicha mintaqaviy bo'limi, BMT Taraqqiyot dasturi, Yevropada Xavfsizlik va hamkorlik tashkilotining Demokratiya va inson huquqlari bo'yicha byurosi, YEXHTning O'zbekistondagi Loyihalari muvofiqlashtiruvchisi, Fridrix Ebert fondi kabi bir qator xalqaro sheriklar bilan hamkorlikda o'tkazilmoqda.

Inson huquqlari bo'yicha
O'zbekiston Respublikasi
Milliy markazining
matbuot xizmati