2-aprel kuni Jenevadagi Millatlar saroyida "Harakat fursati: gender tenglikka erishish uchun inklyuziv, dalillarga asoslangan va o‘zgarishlarga qaratilgan yechimlar" mavzusida davra suhbati bo‘lib o‘tdi. Birlashgan Millatlar Tashkilotining Yevropa iqtisodiy komissiyasi mintaqasidagi Barqaror rivojlanish maqsadlari bo‘yicha mintaqaviy forum doirasida o‘tkazilgan ushbu tadbir Barqaror rivojlanish maqsadlarining 5-maqsadini amalga oshirish masalalariga bag‘ishlandi.

Davra suhbatida gender tenglik sohasidagi asosiy muammolar va yechimlarni muhokama qilish uchun yetakchi mutaxassislar, siyosatchilar va xalqaro tashkilotlar vakillari jamlandi. Tadbirning siyosatni shakllantirishda gender ma’lumotlaridan foydalanishga bag‘ishlangan birinchi yig‘ilishi doirasida Inson huquqlari bo‘yicha O‘zbekiston Respublikasi Milliy markazi direktori o‘rinbosari D.Muratova ayollar huquqlarini monitoring qilish, ularning iqtisodiy va ijtimoiy integratsiyasi bo‘yicha samarali mexanizmlarni ishlab chiqish va joriy etish bo‘yicha O‘zbekiston tajribasini taqdim etdi.

D.Muratova gender siyosatini amalga oshirishda kompleks yondashuvning ahamiyatini, shuningdek, ayollar va qizlar huquqlarini himoya qilish uchun qonunchilik va institutsional islohotlarni rivojlantirish muhimligini ta’kidladi. Gender tenglikka erishish yo‘lida uzoq muddatli barqarorlik va siyosiy qat’iyatni ta’minlashi mumkin bo‘lgan mexanizmlar alohida rol o‘ynashiga e’tibor qaratdi.

Bundan tashqari, muhokamalarda Armaniston, Albaniya, Ispaniya, Avstriya, Moldova kabi davlatlar, shuningdek, “BMT-Ayollar” va YUNFPA xalqaro tashkilotlari vakillari ishtirok etdi. Munozaralar asnosida ilg‘or tajribalar almashinib, gender tenglik sohasidagi dolzarb muammolar atroflicha tahlil etildi.

Tadbir doirasida O‘zbekistonda tasvirga olingan va davlat dasturlari orqali qo‘llab-quvvatlangan xotin-qizlarning hayot yo‘llarida erishgan muvaffaqiyatlariga bag‘ishlangan videolavha namoyish etildi. Bu gender tenglikka erishish bo‘yicha eng maqbul amaliyotlarni targ‘ib qilishga qaratilgan «Unstoppable» («To‘xtatib bo‘lmaydigan») global kampaniyasining o‘ziga xos uzviy bir qismi bo‘ldi.

Davra suhbati yakunida Barqaror rivojlanish maqsadlarining 5-maqsadini amalga oshirish yo‘lida natijadorlikka erishishni jadallashtirish uchun istiqboldagi qadamlar va xalqaro hamkorlik masalalari muhokama qilindi. Ishtirokchilar xotin-qizlarning huquqlari va barqaror rivojlanish sohasidagi hamkorlikni kelgusida izchil davom ettirishga hamda o‘zaro tajriba almashishga tayyorligini bildirdilar.

Ma’lumot uchun: BMTning Yevropa iqtisodiy komissiyasi (BMT YEIK) 1947-yilda EKOSOS tomonidan tashkil etilgan. U BMTning beshta mintaqaviy komissiyasidan biri hisoblanadi. BMT YEIKning asosiy maqsadi umumevropa iqtisodiy integratsiyasiga ko‘maklashishdir.

BMT YEIK tarkibiga Yevropa, Shimoliy Amerika va Markaziy Osiyodagi 56 ta a’zo davlat kiradi. BMT YEIK faoliyatida 70 dan ortiq xalqaro professional tashkilot va boshqa nodavlat tashkilotlar ishtirok etmoqda.

Inson huquqlari bo‘yicha

O‘zbekiston Respublikasi

Milliy markazining

matbuot xizmati