Eron Islom Respublikasi IRNA axborot agentligi "Pezeshkiyon: Eron va O‘zbekiston munosabatlari mustahkamlanishini intiqlik bilan kutamiz" sarlavhali maqola e’lon qildi.

Maqolada O‘zbekiston Respublikasi Prezidenti Shavkat Mirziyoyev va Eron Islom Respublikasi Prezidenti Mas’ud Pezeshkiyon 1 aprel kuni bo‘lib o‘tgan telefon orqali muloqotda bir-birlarini, mamlakatlarimizning do‘st xalqlarini bahor ayyomi Navro‘z va muborak Ramazon hayiti – Iyd al-Fitr bilan samimiy qutlab, tinchlik-osoyishtalik, farovonlik va ravnaq tilaganlari bayon etilgan.

Shuningdek, turli darajalarda faol muloqot va tashriflar davom etayotgani mamnuniyat bilan qayd etilgani, o‘zaro savdo va yuk tashish ko‘rsatkichi, qo‘shma korxonalar soni oshayotgani, poytaxtlar o‘rtasida muntazam to‘g‘ridan-to‘g‘ri aviaqatnov amalga oshirilayotgani, ishbilarmonlik va madaniy-gumanitar almashinuv kengayib borayotgani e’tirof etilgan.

– Pezeshkiyon ta’kidlashicha, Eron xalqlarimiz o‘rtasidagi madaniy, diniy va sivilizatsiya mushtarakligiga asoslanib, ikki davlat manfaati yo‘lida iqtisodiy, siyosiy va madaniy aloqani mustahkamlashga intiladi, – deyilgan maqolada.

Shuningdek, O‘zbekiston yetakchisi Eron Prezidenti va xalqini futbol bo‘yicha milliy terma jamoa jahon chempionatiga muddatidan oldin yo‘llanma olgani bilan tabriklaganiga ham e’tibor qaratgan.

Muharrama Pirmatova, O‘zA