Bugun O‘zbekiston Respublikasi Oliy Majlisi Qonunchilik palatasida «Konstitutsiyaviy islohotlarning mohiyati va ahamiyati: Yangi O‘zbekiston – yangilanayotgan Konstitutsiya» mavzusida xalqaro davra suhbati bo‘lib o‘tdi. Unda Oliy Majlis Qonunchilik palatasi deputatlari, Senat a’zolari, xalqaro ekspertlar, olimlar hamda ommaviy axborot vositalari vakillari ishtirok etdi.

Xalqaro davra suhbatini Oliy Majlis Qonunchilik palatasi Spikerining birinchi o‘rinbosari Akmal Saidov kirish so‘zi bilan ochib, mamlakatimizda amalga oshirilayotgan Konstitutsiyaviy islohotlar haqida ma’lumot berdi:  

– Yangilanayotgan Konstitutsiya umumxalq muhokamasiga qo‘yildi. Mazkur muhokama davrida dastlab 150 ming, keyinchalik muhokamalar davom ettirilgani natijasida 220 mingdan ortiq taklif kelib tushdi. Takliflarning 70 foizi yoshlar tomonidan taqdim etilgan. Ya’ni, Konstitutsiya loyihasi matni bir guruh olim, mutaxassislar tomonidan emas, balki xalqning, keng jamoatchilikning taklifi va fikri asosida ishlab chiqildi. Konstitutsiyaviy islohotlarning dastlabki ikki bosqichida xalqning fikri, takliflari o‘rganildi. Muhokamalarda faol ishtirok etgan 200 ga yaqin fuqarolarga tashakkurnomalar yuborildi. Umumxalq muhokamasi asosida Bosh qomus loyihasi tayyorlangani, Yangi O‘zbekistonni qurish g‘oyasi atrofida butun jamiyat jipslashgani, Bosh qomusimiz tom ma’noda xalq Konstitutsiyasi bo‘layotganidan dalolat beradi, – dedi A.Saidov.  

Davra suhbatida Oliy Majlis Qonunchilik palatasi Spikerining o‘rinbosari Odiljon Tojiyev ma’ruza qilib, Konstitutsiyaviy islohotlarning borishi xususida batafsil ma’lumot berdi:  

 

 

 

 

 

 

 

 

– Bosh qomusimizga o‘zgartirishlar kiritish jarayoni o‘zgacha siyosiy muhitda, ya’ni xalqimizning siyosiy ongi, faolligi, huquqiy madaniyati jamiyatda kechayotgan yangilanish va o‘zgarishlarga monand ravishda o‘sib borayotgan, davlat va jamiyat boshqaruvida ochiqlik tamoyillari ta’minlanayotgan bir davrda o‘tmoqda. Konstitutsiyaviy qonun loyihasi turli ekspertizalardan, jumladan lingvistik, yuridik, gender-huquqiy, korrupsiyaga qarshi, jamoatchilik hamda inson huquqlari bo‘yicha normalarga muvofiqligi bo‘yicha ekspertizalardan o‘tkazildi. Parlament tomonidan joriy yilning 30 aprel sanasida Konstitutsiyaviy qonun loyihasi bo‘yicha umumxalq muhokamasi – referendum o‘tkazish bo‘yicha qaror qabul qilindi.  

Xalqaro davra suhbatida deputatlar, senatorlar hamda xalqaro ekspertlar ham so‘z olib, mamlakatimizdagi mazkur jarayonlar xususida o‘z fikr-mulohazalarini bildirdi. Jumladan, Koreya universiteti Ijtimoiy mas’uliyat instituti direktori Je Hyok Shin O‘zbekistonning yangi tahrirdagi Konstitutsiyasining mamlakat ijtimoiy-siyosiy, iqtisodiy taraqqiyotida ahamiyati katta bo‘lishini, parlament vakolatlarini kengaytirishga qaratilgan normalar muhimligini ta’kidladi. Janubiy Koreya tajribasi haqida ma’lumot berib o‘tdi. 

Yakunda davra suhbati ishtirokchilari, xalqaro ekspertlar Oliy Majlis Qonunchilik palatasi binosi bilan tanishdi.  

Davra suhbatida bildirilgan fikr-mulohazalar, berilgan takliflar alohida to‘plam holida nashr qilinadi.    

Muhtarama Komilova,

Nosirjon Haydarov (surat), O‘zA