O‘mon Sultonligining “Asdaa Oman” nashri 3-4 aprel kunlari Buyuk Ipak yo‘lining ulug‘vor shahri Samarqandda o‘tayotgan “Markaziy Osiyo – Yevropa Ittifoqi” birinchi sammitini yoritdi.

Maqolada O‘zbekiston Respublikasi Prezidenti Shavkat Mirziyoyev raisligida, “Kelajakka sarmoya kiritish” shiori ostida o‘tkazilayotgan tadbirda Yevropa kengashi Prezidenti Antoniu Koshta, Yevropa komissiyasi Prezidenti Ursula fon der Lyayen, shuningdek Yevropa tiklanish va taraqqiyot banki hamda Yevropa investitsiya banki rahbarlari, Qozog‘iston, Qirg‘iziston, Tojikiston va Turkmaniston yetakchilari ishtirok etayotganiga e’tibor qaratgan.

– Sammitning ishbilarmonlik dasturi 3 aprel kuni Prezident Shavkat Mirziyoyev va YeTTB rahbari Odil Reno-Basso uchrashuvi bilan boshlandi, – deyiladi maqolada. – Tomonlarning strategik sheriklik munosabatida yuksak darajaga erishilgani mamnuniyat bilan qayd etildi.

Muallif davlatimiz rahbari hamda Antoniu Koshta va Ursula fon der Lyayen huzurida yurtimizda YeIB mintaqaviy idorasini ta’sis etish to‘g‘risida bitim imzolanganiga ham urg‘u bergan.

Shuningdek, investitsiyaviy hamkorlikni kengaytirish, tovar ayirboshlashni ko‘paytirish, innovatsiya, “yashil” energetika, tog‘-kon, qishloq xo‘jaligi, transport, logistika va raqamlashtirish sohalarida qo‘shma dastur va kooperatsiya loyihalarini ilgari surish, madaniyat, turizm, fan, ta’lim va boshqa ustuvor yo‘nalishlarda faol almashinuvni davom ettirish zarurligi ta’kidlangan.

Dasturga muvofiq, Markaziy Osiyo davlatlari yetakchilari va YeI tarkibidagi asosiy institutlar rahbarlari bugun ish boshlaydigan Samarqand xalqaro iqlim forumi yalpi majlisida ishtirok etishi ham eslatilgan.

Muharrama Pirmatova, O‘zA