Farg‘ona davlat universitetida “Konstitutsiyada inson va fuqaroning asosiy huquqlari, erkinliklari va burchlari” mavzusida davra suhbati bo‘lib o‘tdi. Mazkur tadbir Inson huquqlari bo‘yicha O‘zbekiston Respublikasi Мilliy markazi, O‘zbekiston Respublikasi Fanlar akademiyasi Davlat va huquq instituti, Barqaror rivojlanish markazi, O‘zbekiston nodavlat notijorat tashkilotlari milliy assotsiatsiyasi hamkorligida tashkil etildi.

Mamlakatimizda amalga oshirilayotgan islohotlarning zamirida aholini hayotdan rozi qilishdek ezgu maqsadlar mujassam. Ayniqsa, insonlarning huquq va manfaatlarini himoya qilish ustuvor vazifa sifatida belgilangan. Yangi tahrirdagi Konstitutsiya – yurtimiz va xalqimizning farovon hayoti uchun mustahkam huquqiy asos bo‘layotganligi bilan ahamiyatlidir. “Inson huquq va erkinliklarini ta’minlash – davlatning oliy maqsadidir” degan norma belgilangani ham buni yaqqol ko‘rsatib turibdi. Ushbu maqsadga erishish uchun insonning sha’ni va qadr-qimmati daxlsizligi, davlat organlari tomonidan huquqiy ta’sir choralari mutanosiblik prinsipiga asoslanishi va qonunlarda nazarda tutilgan maqsadlarga erishish uchun yetarli bo‘lishi kerakli belgilanmoqda.  

Davra suhbatida O‘zbekiston Respublikasi Fanlar akademiyasi Davlat va huquq instituti direktori Murodjon Turg‘unov, yuridik fanlar doktori, professor Mirodil Baratov va boshqalar “O‘zbekiston Respublikasi Konstitutsiyasi to‘g‘risida”gi Konstitutsiyaviy qonun loyihasi xususida so‘z yuritib, muhim o‘zgarishlar, yangi normalar haqida ma’lumot berdi.  

  

 

 

 

 

Mamlakatimizda kuchli va adolatli fuqarolik jamiyatini barpo etish borasida jiddiy qadamlar tashlandi. Darhaqiqat, so‘nggi yillarda O‘zbekistonda fuqarolik jamiyati institutlari roli va ahamiyatini tubdan oshirish bo‘yicha tashkiliy-huquqiy chora-tadbirlar ko‘rildi. Xususan, 200 dan ortiq akt, xususan, O‘zbekiston Respublikasining 2021–2025 yillarda fuqarolik jamiyatini rivojlantirish konsepsiyasi amalga oshirilmoqda. Uchrashuv davomida ishtirokchilarga oxirgi besh yil davomida nodavlat notijorat tashkilotlar soni 22 foiz oshgani, jumladan, respublika bo‘yicha 200 ga yaqin yirik nodavlat notijorat tashkilot faoliyat boshlagani to‘g‘risida ma’lumotlar berildi. Shu birgalikda bugungi kunda ushbu fuqarolik jamiyati institutlari inson qadr-qimmati, huquq va erkinliklarini ta’minlash hamda himoya qilish, aholining huquqiy madaniyatini oshirish, jamiyatda bag‘rikenglik va inson huquqlariga doir madaniyatni shakllantirish, barqaror rivojlanishning eng muhim vazifalari ijrosida muhim rol o‘ynayotgani ham qayd etildi.  

Yangilanayotgan Konstitutsiyadagi muhim jihatlar misollar yordamida ishtirokchilarga tushuntirildi. Talabalar bilan “Konstitutsiya loyihasini qo‘llaymiz” aksiyasi ham o‘tkazildi hamda ularning fikr-mulohazalari tinglandi.  

Yangi tahrirdagi Konstitutsiyaning qabul qilinishi “inson qadri uchun” tamoyili asosida xalq farovonligini yanada oshirish, davlat va fuqarolik jamiyatini jadal rivojlanishi uchun mustahkam asos yaratadi.  

M.Sulaymonov, M.Qodirov (surat), O‘zA