Shu yil 12-13 avgust kunlari bo'lib o'tgan inson huquqlari bo'yicha Samarqand forumi yakunida "Yoshlar-2020: global birdamlik, barqaror taraqqiyot va inson huquqlari" nomli Samarqand rezolyutsiyasi qabul qilindi.

Hujjatda, jumladan, yoshlar huquqlari - har kim foydalanishi zarur bo'lgan, ammo ayrimlar yoshining kichikligi tufayli bunday imkoniyatdan mahrum etilgan huquqlar ekani qayd etilgan.

Bu omil ba'zan ochiq, ya'ni yoshga doir qonuniy cheklovlar orqali, aksariyat hollarda esa, yashirincha - yoshlarga nisbatan shakllangan salbiy yondashuv va munosabatlar, aqida va odatlar oqibatida navqiron insonlar hayotiga o'z ta'sirini ko'rsatib kelmoqda. Bunday to'siqlarni hisobga olgan holda, yoshlarga, ayniqsa, qizlar va ayollarga nisbatan kamsitishlarga qarshi kurashish uchun aniq bir himoya vositasiga ehtiyoj mavjud.

Rezolyutsiyada butun dunyo yoshlariga ularning jamiyat hayotida to'la, samarali va ta'sirchan ishtirokini ta'minlash uchun real imkoniyatlar beradigan strategiyalarni ishlab chiqish hamda amalga oshirish yuzasidan davlatlarga murojaat qilingan.

Hujjatda yoshlarning tinchlik va xavfsizlik, barqaror rivojlanish hamda inson huquqlarini ilgari surishda alohida o'rin tutishi, shuningdek navqiron insonlar qarorlar qabul qilish jarayonlarida faol, mazmunli va ta'sirchan ishtirok etishi muhimligi ta'kidlangan.

Inson huquqlari bo'yicha Samarqand forumi ishtirokchilari o'zlari qabul qilgan yakuniy Rezolyutsiyada ham O'zbekiston Respublikasining BMT Yoshlar huquqlari bo'yicha xalqaro konventsiyasini qabul qilishga doir taklifini qo'llab-quvvatlagan. Ularning fikricha, bunday amaliy qadam yoshlarning ehtiyojlarini qanoatlantirishda muhim o'rin tutadi.

Samarqand rezolyutsiyasida, shuningdek xalqaro ahamiyatga ega tavsiyalar qayd etilgan. Navqiron insonlar duch keladigan aniq muammolarning yechimlari bo'yicha birgalikda ish olib borish hamda yoshlarning huquqlarini Yoshlar huquqlari bo'yicha xalqaro konventsiya doirasida himoya qilish va rag'batlantirish masalasi shular jumlasidandir.

Bundan tashqari,  Samarqand forumi yakuniy hujjatidan davlatlarga bir qator chaqiriqlar o'rin olgan.

Shunday qilib, "Yoshlar-2020: global birdamlik, barqaror taraqqiyot va inson huquqlari" nomli Samarqand rezolyutsiyasining qabul qilinishi hozirgi zamon davlatlarining rivojlanishi bilan bog'liq barcha jarayonlarda yoshlarni yanada keng jalab etish zarurligini har tomonlama tasdiqlashga xizmat qiladi.

Shuni ham qayd etish kerakki, Samarqand forumining asosiy milliy tashkilotchisi O'zbekiston Hukumati hisoblanadi. Xalqaro anjumanni o'tkazish mas'uliyati Inson huquqlari bo'yicha O'zbekiston Respublikasi Milliy markazi, shuningdek O'zbekiston Respublikasi Tashqi ishlar vazirligiga yuklangan.

Forum BMTning Inson huquqlari bo'yicha oliy komissari Boshqarmasi hamda ushbu Boshqarmaning Markaziy Osiyo bo'yicha mintaqaviy bo'limi, BMT Taraqqiyot dasturi, Yevropada Xavfsizlik va hamkorlik tashkilotining Demokratiya va inson huquqlari bo'yicha byurosi, YEXHTning O'zbekistondagi Loyihalari muvofiqlashtiruvchisi, Fridrix Ebert fondi kabi xalqaro sheriklar bilan hamkorlikda o'tkazildi.

Samarqand forumi ishida BMT va uning agentliklari, xususan, YUNESKO, Xalqaro mehnat tashkiloti, Migratsiya bo'yicha xalqaro tashkilot, YUNISEF, BMT Aholishunoslik fondi (YUNFPA), BMT Taraqqiyot dasturi, BMT Inson huquqlari bo'yicha oliy komissari Boshqarmasi, shuningdek Parlamentlararo ittifoq, YEXHT, YEXHTning Parlament Assambleyasi, Yevropa Kengashi, Islom hamkorlik tashkiloti, Osiyo Parlament Assambleyasi, Afrika ittifoqi, SHHT, MDH kabi nufuzli xalqaro va mintaqaviy tashkilotlar rahbarlari hamda yuqori darajadagi vakillari ishtirok etdi.

Forumda diplomatik korpus, inson huquqlari bo'yicha xalqaro, mintaqaviy va milliy institutlar, jahon yoshlar tashkilotlari hamda fuqarolik jamiyati institutlari vakillari, olimlar va ekspertlar, O'zbekiston Respublikasi Oliy Majlisi Senati va Qonunchilik palatasi huzuridagi Yoshlar parlamentlari, Yoshlar ishlari bo'yicha agentlik, shuningdek mamlakatimizning barcha hududlaridan 30 dan ziyod yoshlar tashkiloti  vakillari va o'quvchi-talabalar ham qatnashdi.

Inson huquqlari bo'yicha
O'zbekiston Respublikasi
Milliy markazining
matbuot xizmati