3-aprel kuni Respublika bolalar ijtimoiy moslashuvi markazida “Kiber kun – nogironligi bo‘lgan shaxslarni zamonaviy texnologiyalar orqali reabilitatsiya qilish vositalari bilan ta’minlash” mavzusida seminar-ko‘rgazma bo‘lib o‘tdi. Tadbir Inson huquqlari bo‘yicha O‘zbekiston Respublikasi Milliy markazi tomonidan Respublika bolalar ijtimoiy moslashuvi markazi va O‘zbekiston nogironlar assotsiatsiyasi bilan hamkorlikda tashkil etildi.

Seminar-ko‘rgazma doirasida nogironligi bo‘lgan shaxslarni innovatsion texnik vositalardan foydalangan holda reabilitatsiya qilishning zamonaviy usullari borasidagi ilg‘or tajriba va amaliyot atroflicha muhokama qilindi. Unda tegishli davlat organlarining mas’ul xodimlari va nogironligi bo‘lgan shaxslar jamoat tashkilotlari vakillari ishtirok etdi.

Tadbirning ochilishida Inson huquqlari bo‘yicha O‘zbekiston Respublikasi Milliy markazi direktori Akmal Saidov, O‘zbekiston nogironlar assotsiatsiyasi raisi Oybek Isoqov, “Motorika” MCHJ savdo guruhi rahbari Valeriya Chemikos so‘zga chiqdi.

Ishtirokchilar nogironligi bo‘lgan shaxslarni reabilitatsiya qilishning zamonaviy texnologiyalarga asoslangan vositalari va bu boradagi eng yangi jihozlar bilan tanishdilar.

Seminar doirasida “Kiber Motorika” kompaniyasi tomonidan ishlab chiqarilgan protez-ortopediya buyumlari va reabilitatsiya-texnik vositalari ko‘rgazmasi ham o‘tkazildi.

Inson huquqlari bo‘yicha

O‘zbekiston Respublikasi

Milliy markazining

matbuot xizmati

Oʼzbekiston Respublikasi Oliy Majlisi Qonunchilik palatasi