Kecha, 25 noyabr – Xalqaro ayollarga nisbatan zo‘ravonlikka barham berish kunida Birlashgan Millatlar Tashkiloti hayratlanarli raqamlarni e’lon qildi.

"Reuters" agentligi xabar berishicha, o‘tgan yil dunyo bo‘ylab 80 000 dan ortiq ayol zo‘ravonlik oqibatida vafot etgan.

BMT hisobotiga ko‘ra, har o‘n daqiqada bir ayol yoki qiz o‘zaro munosabat yoki oiladagi halokatli zo‘ravonlik qurboniga aylanadi. 83 000 ga yaqin shunday marhumalar taxminan 60 foiz holatda jinoyatchi oila a’zosi yoki sherigi tomonidan o‘ldirilgan.

– Ayollar o‘limi "zo‘ravonlikning davomi" va ajralmas qismidir, – deydi BMT Ayollar siyosati direktori Sara Xendriks. – Hammasi nazorat, tahdid va ta’qib, jumladan Internetdan boshlanadi. Har bir ayol va qiz hayotining barcha jabhasida xavfsizlik huquqiga ega. Davlatlar bunday qotilliklarning oldini olish va aybdorlarni javobgarlikka tortish uchun ko‘proq choralar ko‘rishlari kerak.

Yuqoridagi ma’lumotlar 117 mamlakat hisobotiga asoslangan. BMT statistikasiga ko‘ra, femitsid – ayollarning jinsiy mansubligi tufayli o‘ldirilishi bilan bog‘liq halokatli zo‘ravonlik ayniqsa Afrika qit’asida keng tarqalgan.

Bu borada keyingi o‘rinlarni Janubiy va Shimoliy Amerika egallaydi. Osiyo va Yevropaning ko‘pgina mamlakatlarida ayollarga qarshi jinoyatlar hamon sodir etilayotgan bo‘lsa-da, bunda salbiy voqealar aholi soniga nisbatan ancha kam.

Jahon sog‘liqni saqlash tashkiloti tomonidan yaqinda o‘tkazilgan tadqiqot ko‘rsatdiki, dunyo bo‘ylab ayollarning 30 foizdan ko‘pi hayotining bir bosqichida zo‘ravonlikka duchor bo‘lgan. Shundan kelib chiqib, JSST qurbonlar sonini 840 million kishi, deb hisoblaydi.

Tadqiqotchilar fikricha, muammoning haqiqiy ko‘lami bundan kengroq bo‘lishi mumkin, chunki juda ko‘p jabrdiydalar vaziyatni oshkor qilishdan qo‘rqadi.

Go‘zal Sattorova, O‘zA