Indoneziya poytaxti Jakarta dunyoning aholisi eng zich joylashgan shahriga aylandi, deyiladi BMT Iqtisodiy va ijtimoiy masalalar departamentining aholi bo‘limi tadqiqotida (.pdf).

Hozir shaharda 42 mln aholi istiqomat qiladi, bu qiymat shaharga tutashib ketgan ko‘plab aholi punktlari bilan birga hisoblangan.

Aholi zichligi ko‘rsatkichi bo‘yicha reytingda ikkinchi o‘rinni 37 mln kishi istiqomat qiladigan Bangladesh poytaxti Dakka egallagan. Uchinchi o‘rin Yaponiya poytaxti Tokioga nasib etdi - megapolisda 33 mln kishi istiqomat qiladi.

Birlashgan Millatlar Tashkilotining 2018 yilda e’lon qilingan avvalgi hisobotida Tokio aholi zichligi bo‘yicha 37 mln kishi bilan birinchi o‘rinni egallagan edi.

BMT dolzarb hisobotni tayyorlashda urbanizatsiya parametrlarini yanada aniqroq olish va aholi punktlarini tasniflash imkonini beruvchi yangi metodologiya va mezonlar qo‘llanilganini ta’kidladi.

Hozir shaharlarda yashovchi odamlarning ulushi sayyoramizdagi 8,2 milliard aholining qariyb 45 foizini tashkil etadi. Megapolislar (aholisi 10 mln kishidan kam bo‘lmagan shaharlar) soni 2025 yilga borib 33 taga yetdi. Dunyodagi aholisi eng zich 10 ta shahardan 9 tasi Osiyoda joylashgan. Jakarta, Dakka va Tokiodan tashqari Nyu-Dehli, Shanxay, Guanchjou, Qohira, Manila, Kalkutta va Seul shaharlari shular jumlasidandir.

BMT prognoziga ko‘ra, 2050 yilga borib dunyo aholisi o‘sishining uchdan ikki qismi shaharlarga to‘g‘ri keladi. Asr o‘rtalariga kelib Dakka dunyoning eng yirik shahriga aylanishi kutilmoqda.

Kun.uz