AR-RIYOZ, 4-aprel. /"Dunyo" AA/. Saudiya Arabistonining "Al Harir" gazetasi "Toshkent parlament diplomatiyasi markazi sifatida: Parlamentlararo ittifoqning yubiley assambleyasi" sarlavhali maqola e'lon qilindi, deb xabar qilmoqda "Dunyo" AA muxbiri.

Unda joriy aprel oyida Toshkent Markaziy Osiyo tarixida birinchi marta Parlamentlararo ittifoqning 150-yubiley assambleyasini qabul qilishi ta'kidlangan.

Qayd etilishicha, ushbu tadbir 100 dan ortiq milliy parlamentlardan 2000 dan ortiq parlament a'zolarini birlashtiradi, bu esa asosiy global masalalarni muhokama qilish uchun noyob imkoniyat yaratadi.

"Toshkentning ushbu muhim tadbir uchun maydon sifatida tanlanishi Yangi O'zbekistonning xalqaro parlament diplomatiyasidagi ta'siri ortib borayotganini va uning demokratik islohotlarga sodiqligini ta'kidlaydi", – deb yozgan elektron nashr.

Saudiya OAVga ko'ra, Parlamentlararo ittifoqning 150-yubiley assambleyasining Toshkentda o'tkazilishi nafaqat mamlakat uchun tarixiy voqea, balki Markaziy Osiyoda parlament diplomatiyasini rivojlantirishda yangi bosqichdir.

Maqolada O'zbekistonning Parlamentlararo ittifoq bilan hamkorligi amaliy va institutsional xarakterga ega ekanligi qayd etilan. O'zbekiston Oliy Majlis palatalari vakillari Ijroiya qo'mitada, turli qo'mitalarda faol ishladilar, shuningdek, Parlamentlararo Ittifoqning xotin-qizlar va yoshlar forumlarida ishtirok etdilar.

"Shuningdek, so'nggi yillarda O'zbekistonda parlamentning rolini kuchaytirish, uning vakolatlarini kengaytirish va demokratik mexanizmlarni joriy etishda sezilarli yutuqlarga erishildi", –deyiladi "Al Harir" maqolasida.