8-aprel kuni Inson huquqlari bo‘yicha O‘zbekiston Respublikasi Milliy markazi direktori A. Saidov BMT Bola huquqlari qo‘mitasi raisi o‘rinbosari S.Kiladze bilan uchrashdi.

Uchrashuvning asosiy maqsadi inson huquqlarini himoya qilish sohasida hamkorlik va tajriba almashishni chuqurlashtirishdan iborat   bo‘ldi. Bunda bolalar huquqlariga alohida e’tibor qaratildi.

Muhokama Toshkentda Parlamentlararo Ittifoqning 150-yubiley assambleyasi o‘tkazilayotgani fonida bo‘lib o‘tdi. Har ikki tomon ayni voqeaning inson huquqlari bo‘yicha xalqaro muloqot uchun muhim ahamiyatga egaligini ta’kidladi.

Ishtirokchilar, shuningdek, BMTning Inson huquqlari qo‘mitasi va Bola huquqlari qo‘mitasi doirasidagi faoliyati bo‘yicha fikr almashdilar. Bu, o‘z navbatida, ushbu tuzilmalar faoliyati haqida yanada chuqur tushuncha hosil qilish imkonini berdi.

Suhbat davomida bola huquqlari to‘g‘risidagi xalqaro standartlarni samarali joriy etishda inson huquqlari bo‘yicha milliy institutlarning ahamiyati ta’kidlandi. O‘zbekistonda Milliy markazining bu boradagi faoliyati, bolalar huquqlarini milliy darajada ta’minlashdagi o‘rni va ta’lim sohasidagi tashabbuslariga alohida e’tibor qaratildi.

Markazning parlament a’zolari va huquqni muhofaza qilish organlari xodimlari kabi asosiy guruhlar orasida bola huquqlari to‘g‘risida xabardorlikni oshirish bo‘yicha sa’y-harakatlari, xususan, xalqaro ekspertlar ishtirokidagi ixtisoslashtirilgan seminarlarni tashkil etish orqali amalga oshirilayotgan ishlari yuqori baholandi.

BMT uchun milliy ma’ruzalar tayyorlash bo‘yicha Milliy markazning faoliyati, davlat organlari va fuqarolik jamiyati bilan hamkorlikda xalqaro tavsiyalarning bajarilishini muvofiqlashtirish, ilg‘or tajribalarni almashish uchun xalqaro hamkorlikni rivojlantirish jarayonlari to‘g‘risida batafsil ma’lumot berildi. Bunda Milliy markazning bolalar huquqlarini milliy darajada ta’minlashdagi roli va ta’lim sohasidagi tashabbuslariga alohida ta’kidlandi.

Uchrashuv yakunida tomonlar bolalar huquqlariga alohida e’tibor qaratgan holda inson huquqlarini himoya qilish sohasida muloqotni davom ettirish va hamkorlikni mustahkamlashdan o‘zaro manfaatdor ekanligini bildirdilar.

Uchrashuvda Inson huquqlari bo‘yicha O‘zbekiston Respublikasi Milliy markazi direktori o‘rinbosari D.Muratova va Milliy markazning Inson huquqlari bo‘yicha xalqaro hamkorlik bo‘limi yetakchi mutaxassisi A.Homidov ham ishtirok etdi.

Inson huquqlari bo‘yicha

O‘zbekiston Respublikasi

Milliy markazining

matbuot xizmati

Oʼzbekiston Respublikasi Oliy Majlisi Qonunchilik palatasi