YEKATERINBURG, 12-iyun. /"Dunyo" AA/. O'zbekiston Oliy Majlisi Qonunchilik palatasi deputati, Inson huquqlari milliy markazi direktori Akmal Saidov Rossiyaning Yekaterinburg shahrida bo'lib o'tgan "Huquq va yangi voqelik" mavzusidagi XVIII Yevropa-Osiyo huquqiy kongressida ishtirok etdi, deb xabar beradi "Dunyo" AA muxbiri.

Bu yilgi tadbir Rossiya, Armaniston, Belarus, Braziliya, Tojikiston, O'zbekiston, Qirg'iziston, Qozog'iston, Xitoy, Hindiston va BAA delegatlari ishtirok etdi.

Ular orasida yetakchi huquqshunoslar, olimlar, siyosatchilar va tadbirkorlar bor. Kongress doirasida 50 ga yaqin tadbir, jumladan, 14 panel muhokamalari, yettita strategik sessiya va to'qqizta davra suhbati tashkil etildi.

Akademik Akmal Saidov Yevro-Osiyo huquqiy kongressi va "Qonunning yuksalishi: davr qadamlari" yalpi majlisida so'zga chiqib, jahon taraqqiyot tendensiyalari, xalqaro hamkorlik va qonun ustuvorligini mustahkamlashning dolzarb masalalari, huquqiy soha va ilm-fanga raqamlashtirishni joriy etish masalalariga to'xtalib o'tdi.

Tashrif doirasida Akmal Saidov Sverdlovsk viloyati xalqaro va tashqi iqtisodiy aloqalar vaziri o'rinbosari Lyudmila Berg, viloyatning Inson huquqlari bo'yicha vakili Tatyana Merzlyakova va Ural davlat yuridik akademiyasi rektori Vladimir Bublik bilan uchrashuvlar o'tkazdi. Ularda xalqaro va milliy huquq masalalari yuzasidan fikr almashildi, O'zbekiston va Rossiya huquqshunoslari o'rtasidagi hamkorlikni mustahkamlash masalalari muhokama qilindi.

Yevropa-Osiyo huquqiy kongressi 2007-yildan beri har yili o'tkazib kelinmoqda. Anjuman Ural davlat yuridik universiteti va Rossiya huquqshunoslari assotsiatsiya tomonidan tashkil etiladi.